SHILLONG: Ka rukom pyrkhat ne ka jabieng ki Public Information Officer-PIO haba ki ioh pdiang ia ka jingpan jingtip RTI, ki pule bad wad shwa haei ki kyndon ban kiar na kaba ai jingtip, ha jaka ban pynbiang ia ki jingtip kumba la pan ki briew.
Ia kane la ong u Chief Information Commissioner ka jylla u bah H Nongpluh, IPS ba la shongthait haba shim bynta ha ka jingiathir halor ka RTI kaba la pyllong ka Standing Conference of Public Enterprise (SCOPE) ha Vivanta Hotel, Shillong mynta ka 1 tarik Lber 2024.
U bah H Nongpluh u la ong ba kum u khlieh ka Commission ula ju ong ia ki PIO ba ki dei ban pyrkhat shwa kaei kaba lah ban ai jingtip kaba bha ia ki pan jingtip, ha jaka ban wad ban buhrieh pynban.
Haba kren halor ka Right to Information (RTI) Act 2005, ka dei kaba donkam bha ban wanrah ia ka jingshai bad ka jingkhuid ha ka jingtreikam ki tnad sorkar. Watla ka dei ka ain kaba lyngkot tang 31 tylli ki kyndon bad ka bym kyllain ban sngwthuh ruh hynrei ka dei kaba kongsan bha ia ki paidbah. Ha kajuh ka por, u la ong ba kaba donkam ka long ba kito kiba pan jingtip kim dei ban long na bynta ban thmu sniew iano iano ne ban kamai.
Ki PIO kim dei ban buhrieh ban ai jingtip katkum ka RTI
