SHILLONG: Ka HYC Sohiong circle mynta ka sngi ka la kit shibun ki jingduna ka CHC Sohiong kumba la ujor ki paidbah ha ka myntri ka tnad ka koit ka khiah ka kong Ampareen Lyngdoh.
U President ka seng bah Purningstar Shabong u la iathuh ba ka CHC Sohiong ka dang don shibun ki jingduna naduh ki nongtrei haduh ki tiar, bad ka rukom kren heh ne ia ki kyntien ba kren ki doctor, ki nurse kiba pynmong ia ki paidbah haba ki wan shah sumar ne shim dawai ha katei ka CHC.
Ula iathuh ba la iakren bad ka myntri ia ka jingbym lah ka CHC ban ai ka jingshakri kum ka CHC na ka jingduna doctor, ki nurse bad la kyrpad ia ka sorkar ba kan thung katkum ba la kdew ha ka Indian Health Standard Protocol.
Ka seng ka la ai jingmut ba ka sorkar kan pyntreikam da u Toll Free Number khnang ba ki paidbah kin ioh ban ujor sha ka sorkar haba ki shah kren bein ne shah kyntait ban sumar.
Dang shen, ka HYC Sohiong circle ka la pyllong ia ka jingjurip ia katei ka CHC hadien ba ki ioh ia ka jingujor na ki paidbah.
Na ka liang ka myntri ka la kular ban shim khia ia ka jingujor ka HYC hynrei ha kaba iadei bad ka jingduna doctor, ka la ong ba wat ka sorkar ruh ka duna doctor bha bad ka shem jingeh ban pynbiang.
Ha kajuh ka por, ka kong Ampareen ka la ong ba ka la bthah ia u DMHO ban leit jurip ia ka CHC Sohiong ha ka 8 tarik Lber ryngkat ki dkhot ka HYC Sohiong.
Ka la ong ba ka donkam ruh ban ai ka jinghikai ia ki nongtrei ki hospital ba kin nang ban pyniadei ban kren, ia kiba wan sha ki jaka sumar.
Kit ka HYC Sohiong ha ka myntri ia ki jingujor ki paidbah ia ka CHC Sohiong
