SHILLONG: U Myntri ka tnad Social Welfare u bah Paul Lyngdoh mynta ka 29 tarik Rymphang 2024, u la pyllait paidbah ia ki kyndon Ain ba Kongsan jong ka Protection of Children from Sexual Offences (POCSO) Act, 2012 ba la pynkylla ha ka ktien khasi.
Ia kane ka Kyndon Ain jong ka POSCO, Act ha ka ktien Khasi la pynkylla da ka Prof. Streamlet Dkhar, Associate Prof. Saralin A Lyngdoh, Dr Gordon GD Dkhar bad u Anirban Chakraborty.
Haba kren ha kane ka sngi, u Myntri ka tnad Social Welfare u bah Paul u la ong ba kane kadei ka sngi ban sah kynmaw namar ba ha ka sien ba nyngkong hadien ka jingioh ia ki dak alphabet Khasi ha u snem 1841, mynta ka sngi la ioh sa ia ka Ain POSCO ha ka ktien Khasi.
U bah Paul u la ong ba kum ki nongthaw ain bad ki nongshong shnong kidei ban iatreilang na bynta ban rat dyngkhong ia ki kam thombor pyrshah ia ki khynnah.
Ha kane ka sngi ka Myntri ka tnad Kam Ain ka kong Ampareen Lyngdoh, ka la pyllait paidbah ia ka Almanak bad ia ka kaiphod jong ki Mukotduma POSCO ba la pynkhreh da ka Meghalaya State Commission for Protection of Child Rights.
Ka kong Ampareen ka la ong ba dei ban iatylli lang kawei ban pyntikna ban pynduh jait kine ki kam thombor bad ka hok kadei ban ieng rasong.
Ka la ong ba ka tnad Ain kadei ban pyntikna ba kan don ia ki ain ba skhem ban ai jingiada ia baroh ki kynthei ha ka imlang sahlang.
Katba ka Chairperson jong ka Commission ka kong Iamon Syiem ka la ong ba ka jingpynkylla ia ka ain POSCO ha ka ktien khasi ka long kaba eh bha namar ba ki don ki ktien sih ki bym sngew iahap ban pyndonkam.
Ka kong Syiem, ka la ong ba ka Commission mynta ka dang pynkhreh ban pynkylla sa ha ka ktien Garo ia ka POSCO Act.
Ha kane ka sngi la donlang ka EM ka KHADC ka kong Macdalyne Sawkmie Mawlong, Dr K Lyngdoh Nongbri Director Meghalaya State Judicial Academy, ki khynnah skul nalor kiwei de.
Pyllait u bah Paul ia ka ain POCSO da ka ktien Khasi
