SHILLONG:U myntri rangbah ka jylla u Conrad K Sangma ula ong ba un buddien tyngeh na ki tnad sorkar pdeng ba kin bhah kam kham bun ia ki trai muluk ka jylla ha ki tnad sorkar pdeng kiba don ha kane ka jylla.
U myntri rangbah ula ong ia kane haba jubab ia ka mat kaba la wanrah u MLA ka Nongkrem u bah Ardent M Basaiawmoit hapoh ka ing dorbar thawain mynta ka sngi.
Haba kubur ia ka jingai jingmut jong ki dkhot ka ing dorbar halor kane, u Conrad ula ong ba un buddien bad shim khia hi ia kane ka mat khnang ban ai jingmyntoi kham bun ia ki samla ka jylla ha ki tnad sorkar pdeng, watla ka lah ban don ki kyndon namar ba ki dei ki ophis sorkar pdeng.
Ula ong ba ha ka por ba u iakynduh ia u myntri ka tnad tribal affair, ula iakren ban bhah kam kyrpang ia ki samla ka jylla ha kaba u myntri ula ai dak jingkyrmen.
U Conrad ula ong ba ha NEHU, 81 percent ki samla pule ki dei na Meghalaya bad kumjuh ha NIFT na ki 49, 40 ngut ki dei na kane ka jylla kiba ioh kam ha ka kam Group C.
Pynthikna u MR ban dawa bhah kam bun ia ki trai muluk ha ki tnad sorkar pdeng ba don ha ka jylla
