SHILLONG 28, Jylliew: U Chief Executive Member ka Khasi Hills Autonomous District Council (KHADC) u bah Pyniaid Sing Syiem u la ong ba ka Executive Committee kaba mynta kan buddien lut ia ki kam ba sahteng kiba la sdang ka EC barim.
Haba jubab halor ka jingiatai nia hapoh ka ïing dorbar mynta ka sngi, u CEM u la ong ba ka jaka jngohkai ha Jynkieng Kalong ka dang sahteng namar ba namar ba don ka mukotduma khamtam na ka NGT bad ka EC kan buddien bhai a kane.
U la pyntip ruh ba ka Khasi Hills Regulatory Building Authority kala treikam bad ka EC ka dang pynjanai shuh ia ki kyndon jongka watla ka la dep ban ai jingbit sha kumba 81 tylli ki briew kiba pan ban shna ïing.
Shuh shuh u CEM, u la ong ba ka Land Act ka dang don ha ka jingpynbeit ryntih ia ki Rules, bad kumjuh ka Solid Wastes Management Act 2020 kaba ai bor ban wanrah ia ka jingkhuid ka jingsuba.
U la pynkynmaw ruh ia ki shnong ba shah ktah ha ka jingpynbeit pud hapdeng ka Meghalaya bad ka Assam, ha kaba ka EC kan shim ia ka jingai jingmut na ki khlieh nongsynshar.
Haba pyntip ba ka Council ka la trei borbah ban wanrah ka jingsuk ia ki trai shnong, u CEM bah Pyniaid u la iathuh ba la lah ban plie ia ki District Court ha Nongpoh, Nongstoin bad Mawkyrwat ban pynbha ia ka bishar khadar jong ka District council bad kane kala pynsting ia ki paidbah namar kiba lah ban leh ia ki case ha ki District khlem wan sha Shillong.
Ha kajuh ka por, u la iathuh ba ka Council kan pyntreikam noh ia ka portal ka eGramswaraj jong ka sorkar pdeng ha kaba ia ki skhim, ki jingtip, bad ki UC yn online na ka Council bad kane kan pynsuk shibun bad kan pynlait ia ka jinglut jingsep bad ka jingbam ka por.
U la iathuh ba ka Finance Ministry kala phah ia ka Health Sector Grant ban pynbha ia ka rukom sumar ha ki shnong ha kaba ka Council kan dei kawei ka nongioh bynta ha kane hynrei haduh mynta kam pat don kano kano kaba phah ia kane ka Grant bad ka EC kan buddien ia kane.
Haba pynthikna ba ka EC kan buddien ia ki kam ba la leh kiwei ki EC mynshwa, u bah Pyniaid u la pynkynmaw ban shim khia ia ki projek ba la sdang kum ki jaka jngohkai kum ha Maraikaphon bad ha Bishop Fall, Mawlai ba kin iarap ban pynmih khajna ia ka Council.
La don ruh ka jingshna ia ka iew ka District Council ha kiba bun ki jaka bad don kiba dang iaid bad la shim khia ba ki iew ki hat yn pynbeit ia ka soskular kaba shai ia ka share, bad don kiba siew 40:60, don ba 60:40 bad kane kala iarap ban kyntiew ia ka khajna ka Council.
Halor ki jingeh jong ki paidbah ha khappud, bad ka sorkar jylla kala kynthup lang ia ka KHADC, ha kaba ki shnong Khasi kin wan sha Meghalaya.
Kawei pat ka mat, ka long ba u CEM u la kular ban thaw lad ban ioh biang ban ai syrnot na ka Council kumba leh mynshwa na ka jingshah knieh noh ha ka sorkar jylla.
U la iathuh ruh ba ka 15th Finance Commission kala wan kynduh ha 2019 bad la dep ban phah ia ka plan san snem bad haduh mynta la aiti T. 1500 klur naduh 2019-2024. Bad ka EC kan buddien ia kane ha kaba ka pisa kam dei ban iaid jyllain hynrei ka dei ban poi beit sha ka Council.
Ia ka bhah kyrpang ban shna ka ka Police Beat House ha Langpih khlem pat lah ban shna namar ba dang ia pynbeit bad ka sorkar.
Khasi Medicinal Institute ha Lum sohpetbneng, ka dei jaka sumar tynrai ba heh bha. Kane ka Institute kan don ki jingshna dawai kynbat, ki jingthiah bad kiwei ki jingsumar tynrai. Mynta kane ka Institute ka dang duna ki jingdonkam kum ka um. La ai syrnod kumba 60 ngut bad dang bun kiba aplai syrnot.
Halor ki mukotduma para riewlum, kaba la shah knieh ha ka District Court ka sorkar jylla, ka EC kala sngew khia halor ka jingshah pynduh bor ka ïing kashari ki District Council Court bad kan buddien bad ka sorkar jylla ba ki bor jong ki kashari ka District Council kim dei ban shah ktah ha ka Kashari jong ka sorkar kaba la pynjari da ka CrPC.
T.1500 klur na bynta san snem ia ka KHADC na ka 15th Finance Commission
