Shillong: Ka Voice of the People Party (VPP) ka pynrem jur halor ka jingkren u Bah Prestone Tynsong, Symbud Myntri Rangbah ka Jylla Meghalaya, kaba u la kren ha ka sngi plie ïa ka SSLC Examination Centre ha Khad-ar Blang Border Higher Secondary School, Pongtung, ha ka 12 tarik u Naiwieng 2026, ha kaba u la pynïasyriem ïa ki nonghikai deficit kiba ïakhih ïa ka hok jong ki bad ki ‘kruiñ’. Ka VPP ka pynpaw ïa ka jingsngewkhia kaba jur halor kane ka jingkren kaba pynjah burom ïa ki nonghikai kiba pyndonkam ïa ka hok jong ki ban pynpaw ïa ka jingsngewkhia bad ban pyrshah ïa ki mat kiba ktah ïa ki bad ka pule puthi.
Ka VPP ka kwah ban pynkynmaw ïa u Bah Prestone Tynsong ba ha ka synshar paidbah, ka jingpynpaw ïa ka jingpyrshah kam dei ka jingpynwit ïa ka Sorkar, bad ki nongïakhih kim dei ki nongshun jong ka Sorkar. Ki dei ki nongshong shnong kiba don ïa ka hok ban kylli, ban dawa jingpynshai bad ban pynpaw ïa ka jingsngewkhia halor ki rai bad ki sienjam jong ka Sorkar. Ka long kaba sngewsih ba u Symbud Myntri Rangbah, uba long uwei na ki nongïalam ba ha khlieh duh jong ka Sorkar Jylla, uba dei ban long ka nuksa jong ka jinglong rangbah, ka jingsngewrit bad ka jingburom ïa ka sur jong ki paidbah, u jied pat ban pyndonkam ïa ki kyntien kiba pynjah burom ïa kiba pynpaw ïa ka jingpyrshah. Ka bor synshar kam dei ka lad ban ñiewbeiñ ïa ki paidbah, hynrei ka dei ka jingkitkhlieh ban sngap, ban sngewthuh bad ban jubab ïa ki jingkylli jong ki.
Ka VPP ka dawa ïa u Bah Prestone Tynsong ba un pynshai halor kane ka jingkren bad ban pyni ïa ka jingburom ïa ki nonghikai kiba pyndonkam ïa ka hok synshar paidbah jong ki. Kane ka long katkum ka kyrwoh na u nongaiktien ka VPP u Dr. Airpeace Well Rani.
Pynrem jur ka VPP ba kynnoh u bah Prestone ia ki nonghikai kum ki kruiñ


