Shillong: Ki nonghikai skul Deficit hapoh ka lama ka Khasi-Jaintia Deficit School Teachers Association (KJDSTA) kila khreh ban leit tur noh puk sha ophis ka Meghalaya Board of School Education (MBoSE).
Ka KJDSTA ka la shim ïa rai ban dang bteng ïa ka jingïakhih ba khlem buh por jong ka halor ka jingbym ïoh jubab ïa ki jingdawa ba la slem na ka Sorkar Jylla. Kala sdang ia ka jingiakhih naduh ka 11 tarik mynta u bnai da kaba pep skul khlem pud.
Ka General Secretary ka KJDSTA ka Kong Barbara Lamin ka la pyntip ba ki nonghikai ki la shim ia kane ka rai ha ka jingïalang ba la long ha ka sngi Nyngkong ka 16 tarik u Naiwieng 2026, ha madan phutbol Sawmer, Upper Shillong.
Ka Kong Barbara ka la ong ba ki nonghikai kin leit iakhih hakhmat ka ophis ka MBoSE ha ka 19 tarik hadien ba ka sorkar ka dang iai mynthi ia ki mat jingdawa.
Ka jingdawa ki nonghikai Deficit, kadei ka jingbym pyntreikam ïa ka Centralized Provident Fund kaba 10 percent, ka jingpynslem ban pynkiew ïa ka Dearness Allowance (DA) bad ki jingsiew ba sahteng, ka NPS, ki Pension Scheme jong u snem 2023 bad 2026 kiba ka association ka la kyntait, ka jingkynnoh ba ka don ka jingleh thok ha ka jingpynkylla ia ka Board of Trustees bad ka thungkam thung jam.


