Shillong: U Speaker ka Iing Dorbar thawain ka jylla u Thomas A Sangma ula ong ba dang bishar bniah ia ka jingpyntip ki 8 ngut ki MLA ka UDP kiba iasoh sha ka BJP.
Mynta ka sngi, 8 ngut ki MLA kiba iasoh dang shen sha ka BJP, kila kynduh ia u Speaker ban buddien ia ka shithi kaba kila dep ai mynshwa halor kane.
Haba kren sha ki lad pathai khubor, u Thomas ula ong ba kumba long mynta, ym pat ithuh kum ki MLA ka BJP namar ba dang eksamin ia ki kyndon ain bad ula ong ba ym lah ban shim kum ka merger ne ka jingiasoh lut hynrei ka dei ka jingiapait ne split.
Ha kajuh ka por, ula ong ba ula ioh ia ka jingujor na u President ka UDP bah Metbah Lyngdoh bad ka party pyrshah ia ki MLA bad ula ai por khadduh lashai ba kin pynbeit ia ki jingthoh bad lada ym wan lashai, un iaid shakhmat ban bishar ban ai ia ka rai shen.