Shillong: Ki 8 ngut ki MLA ka UDP kila pyndep ia ka jingrung sha ka BJP mynta ka sngi ha nongbah Delhi.
La pdiang sngewbha ia ki, da u Sambit Patra, nalor u Kiren Rijiju bad kiwei ki nongialam ka BJP ha ophis ka BJP ha Delhi.
La ioh jingtip ba lada ka la biang ka jingkren, kin sa rung syndon ha kaba kin shah pdiang burom haki nongialam ba heh ka BJP ha Delhi.
Ha ka jingshisha, ka tyllong khubor ka la ong ba ka jingleit pyniasoh jongki lah ban kynriah sha u bnai Risaw.
Ki mat jingdawa ba kila buh shwa ban rung sha ka BJP ki long ban pynrung noh ia ka ktien Khasi ha ka khyrnit ba phra ka riti synshar ka ri, ka ILP ne ka MRSSA kaba khlain, ka jingpyllait ia ka jingkhang tih dewiong, ka jingpynkynriah ia ki Dalit Sikh na Them Iewmawlong sha jaka shipai, nalor kiwei pat.
Ki 8 ngut ki MLA ka UDP kiba la pynkhreh ban rung sha ka BJP hadien ba ka la kular ban pynurlong ia ki mat jingdawa jongki, ki long bah Lahkmen Rymbui na Amlarem, bah Kyrmen Shylla na Khliehriat, bah Balajied Synrem na Shella, bah Synsharkupar L Thabah na Sohiong, bah Olan Singh Suin na Mawsynram, bah Matthew Beyondstar Kurbah na Mawphlang, bah Mayralbon Syiem na Nongpoh bad bah Pius Marwein na Ranikor.