Shillong: Na ka jingkawut kynsan ka lyer ka BJP ba ki 8 ngut ki MLA ka UDP kynthup u MLA ka Nongpoh bah Mayralbon Syiem, ki lah ban leit iasoh shaka BJP, mynta ka sngi kumba 30 ngut ki riew paidbah, kila pyniasoh sha ka BJP ha Nongpoh, Ri-Bhoi.
Kane ka la jia mynta ka sngi kaba dei ruh ka lyngkhuh sngi kha kaba 76 u Prime Minister u Narendra Modi.
Ka BJP ka la pyllong ruh mynta ka sngi ia ka jingrakhe ia kane ka sngi ha Nongpoh ha ophis ka Party BJP ha ka jingdon lang ki nongialam ka BJP na Meghalaya, BJP Ri Bhoi bad Nongpoh kynthup ka Kong Daniella Lyngdoh Nonglait kum ka State BJP Secretary ba in-charge ia ka Ri Bhoi, u President ka BJP Ri Bhoi u Bah Sen Thabah, u State Secretary ka BJP Morcha u Bah Duruth Majaw, u State president ka ST Morcha u Himanta Tmung, u Bah Angelus Sun, u Parlat Toor lem bad kiwei ki nongialam ka BJP.
Ki la pynshai ruh ba ka BJP kam dei ka party kaba pynshitom ia ki Kristan bad kine ki dei tang ki jingpynsngewthuh bakla jong ki riew shim kabu, hynrei ka party BJP ka dei ka party kaba kdup lut ia baroh bad kaba ka kwah ban kyntiew ia ka jingiatylli hapoh ka ri.
Ha kane ka sngi, kila ot cake bad thang mombati ruh shi bynta jong ka jingrakhe ia ka sngi kha u Modi.