Shillong: U nongialam ka BJP Meghalaya u bah David Kharsati uba dei ruh u MDC barim, ula kynthah jur ia kito kiba kren kynthah bad kynnoh iaka BJP ba ka dei kaba isih ia ki Khristan ne shit niam.
Haba kren ha ka jingpdiang burom ia u Dr. Jemino Mawthoh sha ka BJP ha ophis ka party mynta ka sngi, u bah David ula ong ba ym dei ban sngap ia kiba nabar kiba kren kynthah ia ka BJP bla bla bla khlem tip eiei ia ka BJP.
Haba kynthah ia ka jingkren u President ka VPP bah Ardent Miler Basaiawmoit ba ka RSS ka dei ka tnat ka BJP, u bah David ula ong ba ula iohi ha kine ki sngi, don u President kawei ka seng sain pyrthei uba kren biej ia ka BJP khlem tip eiei ia ka duh ka dang. U la kyntu ia ki paidbah ban ym shah ialam bakla ha kum kine ki jingkren bym don nongrim satia.
Ula ong ba ka nongrim ka BJP ka long, wan nyngkong ka ri, wan baar ka party bad wan balai ka malade, kaba mut shakri ia ka ri, ia ka party bad ialade kaba khadduh, hynrei ha Meghalaya ki politishian, ki shakri shwa ialade, nangta ia ka party bad ia ka ri kim tip eiei.