Shillong: Ha kine ki sngi, la saphriang ki khubor ha ki rynsan social media ba u MLA ka West Shillong u bah Paul Lyngdoh u dei uwei na pdeng ki 9 ngut ki MLA kiba lah ban rung sha ka BJP.
Hynrei mynta thret kyndit ki paidbah hadien ba ka kyrteng jong u, kam don satia ha ka thup ki 8 ngut ki MLA kiba don ka jingiakren bad ki nongialam ka BJP ha Delhi ban rung sha ka BJP lada ka pdiang ia ki mat bad ki kyndon ba kila buh.
Ha ka jingiakren bad ki lad pathai khubor mynta ka sngi, hadien ba la wai ka jingialang ka emergent meeting ka CEC ka UDP, u MLA ka UDP na Mawsynram u bah Olan Singh Suin ula pyllait kdar ba ka kynhun ka kynhun ki MLA kiba iakynduh ia ki nongialam ka BJP ha Delhi, ka dei tang 8 ngut na ki 12 ngut ki MLA ka UDP.
Kane ka mut ba u bah Paul uba la mutdur ki paidbah ba un dei uwei na ki MLA ha kane ka kynhun, u lah ban ym dei satia.
Katkum ka jingtip, ki 8 ngut ki MLA ka UDP kiba la pynkhreh rung sha ka BJP lada ka pdiang ia ki kyndon bad ki mat ba kila buh ki long u bah Pius Marwein na Ranikor, bah Balajied Synrem na Shella, bah Lahkmen Rymbui na Amlarem, bah Mayralbon Syiem na Nongpoh, bah Olan Singh Suin na Mawsynram, bah Kyrmen Shylla na Khliehriat, bah Mathew Beyond Kurbah na Mawphlang, bad bah Synsharkupar L Thabah na Sohiong.
Kine ki lah ban rung sha ka BJP shen mynta u bnai lada ka BJP ka pdiang ia ki mat ba kila buh hakhmat jongki.
Kyndit ki paidbah, U bah Paul Lyngdoh um don haka thup ki 8 ngut
