Shillong: Ka Hima Marbisu ka la plie paidbah ia ka iew nongrep ha shnong Lwai harud ka surokbah Shillong-Nongstoin ha ka sngi Palei.
Ia ka iew ki nongrep la sdang sain dur ha u snem 2020-21 da ka Executive Dorbar ka Hima Marbisu.
U Deputy Commissioner ka East Khasi Hills u Abhilash Baranwal, IAS ula plie ia kane ka iew ha ka jingdon lang u Sirdar ka Hima Marbisu bah Starsing Kurbah, u bah Aiban S Swer, Director ka MBDA/MBMA nalor kiwei ryngkat ki rangbah shnong, ki khun ki hajar bad ki nongshong iew.
Ki dukan ki don 146 tylli kiba la shna bha bad tap da ka tin bad ker da ka dewbilat ban lait na u slap ka lyer bad la shna da ka jingnoh synniang ki khun ki hajar ka Hima Marbisu kiba kwah ban shong dukan kaba la kot 49 lak tam ryngkat ka jingkyrshan na ka MBMA 75 lak, ka NEC 50 lak bad baroh ka la kot sha ka T.174 lak.
Haba kren ha kane ka jingialang, u DC ula ai jingiaroh ia ka sienjam ba ka Hima Marbisu ban kyntiew ia ki nongrep lyngba ka iew bad ula tyrwa ban ai ka jingkyrshan ha kano kano ka bynta ba ka ophis ka lah ban leh ban pynbha shuh ia ka.
Katba u bah Aiban S Swer ula kyntu ia ki nongshong iew, kiba wan iew, ba kin bat ia ka jingkhuid jingsuba, ban plie ia ka iew man ka sngi, bad kumjuh ban pynneh ia ka jingiadie iathied kaba khuid, khnang ban ioh ia ka jingshaniah na ki paidbah. Ula kyntu ba kim dei ban leh kumba long ha Iewduh ban pyntam ia ki mar sha lynti iaid ki briew hynrei ki dei ban long kiba discipline khnang ba kan long kaba itynnad.
Kumjuh ruh la ioh ia ka jingkren na u MLA barim ka Mawphlang u bah Kennedy C Khyriem nalor kiwei pat.
La pynshong shit ia ka iew da ka jingshad tynrai bad ka jingphawar na u samla Akbar Nongdhar na ka kynhun Lasyrdoh.
Wat leh kum ha Iewduh ban pyntam mar sha lynti iaid briew, la plie ia ka iew nongrep ha Lwai
