Shillong: U MLA ka Nongkrem uba dei ruh u President ka Voice of the People Party (VPP) ha ka kyrwoh lyngba ka video mynta ka sngi, u bah Ardent Miller Basaiawmoit ula pynpaw ba un don ryngkat bad ki paidbah Garo ha ka jingiakhun jongki.
U bah Ardent ula phah ia ka kyrwoh sha ki paidbah Garo ban don ryngkat bad ki ha ka jingiakhun ban iada ia ka riti dustur, ka khyndew ka shyiap na ka jingthmu klun kiwei pat. Ula pynrem jur ia ka jingkren ki nongialam ka sorkar MDA, ha kaba kila ju kren bay m lah ban khang ia ki bym dei riewlum ban iashim bynta ha ka MDC elekshon sha GHADC. Ula ong ba ula ju kren ia kane mynshwa ba kum kane ka jingkren khlem jingkitkhlieh kan wanrah ia ka jingktah.
U President ka VPP ula kynnoh ba kane ka jingkren ki nongialam ka sorkar MDA, ka la pynshlur ia kiwei ki jaitbynriew ban mih shakhmat ban iashim bynta. U bah Ardent ula ong ba ka jylla Meghalaya ka dei ka jylla ki riewlum ha kaba ki longshwa kila iakhun ban ioh jingiada lyngba ka Sixth Schedule ha ka riti synshar ka ri India.
U bah Ardent ula ong ba haba peit bad sngap ia ka jingkren ki nongialam ka MDA, ka paw ba kim pushe eiei ia ki riewlum bad u sngew ba kum ki paidbah riewlum ka jylla ban ia ieng lang ban iada ia ka jaitbynriew. Ula kyrpad ia ki paralok Garo ban kiar na kaba leh ia ki kam pynjot ia ki mar ki mata bad ki kam thombor hynrei ban iakhun da ka lynti kaba jai jai ban ioh ia ka thong.
Phah kyrwoh u bah Ardent sha ki paidbah Garo
