Shillong: Na ka jinglong kap kap palat ki briew, ka la pyllong ia ka sorkar jylla ba kan pynshai khnang ban lait na kano kano jingeh.
Ka tnad sam marbam ka jylla ka la hap ban pynshai hadien ba ki paidbah kila kap kap bad syier thot thot ioh duh ia ka lyer shet ne LPG na ka jingkhie ka thma hapdeng ka Iran pyrshah bad ka Israel bad America.
U Myntri ba dei peit ïa ka tnad sam marbam ka jylla u Bah Methodius Dkhar u la ong ba ka sorkar ka dang buddien ïa ka jingpynpoi umphñiang LPG ryngkat ka jingïatreilang bad ki kompeni die umphñiang ba kynthup ïa ka Indian Oil Corporation, ka Bharat Petroleum bad ka Hindustan Petroleum.
U Myntri u la ong ba ka stock ia ka LPG ka dang biang ha Meghalaya bad u la kyrpad ïa ki nongshong shnong ba kim dei ban tieng ne ban thied lypa ïa ki cylinder.
Ha kajuh ka por, u la maham ban leh da kaba tyngeh pyrshah ïa kiba die lypa kiba die tuh ïa ki cylinder LPG katkum ka Essential Commodities Act.
Na ka liang u President ka Meghalaya LPG Distributors Association u Rap L. Blah u la ong ba ka dor jong kawei ka cylinder LPG kaba 14.2 kg ka long ₹1,005 eiei ha ka jylla.
U la ong ka jingpynbiang ha kiba bun ki bynta jong ka jylla Meghalaya ka dang neh kumjuh, hynrei ïa ka jinglong jingman ha ri lum Garo la pynleit jingmut kyrpang.
Na ka thma Iran-Israel, USA, wat ia kap kap than ia ka LPG, ong ka sorkar
