Shillong: U nongialam ka liangpyrshah u Dr. Mukul Sangma ula ujor ejahar ha Phulbari Police Station pyrshah ia ka jingkren u MLA barim ka Phulbari u Estamur Mominin kaba la saphriang ha ki social media, ha kaba la kynnoh ba u pynmih ia ki kyntien kiba pynshit bad wanrah ia ka jingsngewpher jaitbynriew.
Ia kane ka video la saphriang ha ka 9 tarik Lber 2026 ha kaba u Estamur Moninin ula kren hapdeng ka jingdon ki briew hadien ba ula shah shoh ha ki briew katba u dang thmu ban leit thep kyrteng ha DC ophis ha Tura ban iakhun ia ka elekshon sha ka GHADC.
Ha ka ejahar, u Mukul, uba dei ruh u Nongialam liangpyrshah bad u MLA ka TMC, ula ong ba ka video ka pyni ba u Mominin ula kren ha ka jingialang, lehse kala shu mih ne da ka jingthmu ban pynshit ia ki katto katne ki kynhun bad aiding ban mih ka jingkulmar hapdeng ki kynhun ha ka thain.
U Dr. Mukul ula ong ba ka video kaba pynmih ia ka kyrteng jong u bad ar ngut kiwei pat, ba la ai jingmynjur ia ka jingthep kyrteng u Mominin bad ka jingiashimbynta ki bar jylla, ka dei kaba khlem nongrim khlem sakhi eiei.
U Dr. Mukul u la ong ba kane ka jingkam ka lah ban aiding bad pyrshah ia u bad ka jingleh ia ki kam bymman da kawei ka jaidbynriew pyrshah ia kawei pat.
U Mukul ula kyntu ia ki Pulit ba kin leh eiei kat kum ka kyndon 192,196, 353 bad 57 jong ka Bharatiya Nyaya Sanhita lane kino kino ki kyndon kiba sngew iahap.
Ujor ejehar u Dr. Mukul ia u MLA barim ba kren pynshit bad pynmih ia ka kyrteng
