Shillong: Hadien ka jingpynbna ka sorkar India ba baroh ki jaka pule, ki prokram ophis sorkar bad kiwei kiwei ki jingialang ki dei ban rwai ia baroh 6 dkhot jong ka jingrwai Vande Mataram ha kitei ki prokram, ka KSU ka pynpaw ia ka jingpyrshah jur ia katei ka hukum bad pynsngew ba ka KSU kan ym pdiang da lei lei ruh em ia katei ka jingleh donbor ka sorkar pdeng.
Ka jingrwai Vande Mataram kaba la thaw da u Bankim Chandra Chatterjee ha u snem 1882 ha ka ktien Bengali bad Sanskrit ka don hynriew dkhot bad ha ki dkhot kiba shadien la rwai shaphang ki blei Hindu, kumta ka committee kaba kynthup ia u Rabindranath Tagore, Maulana Azad, Subhash Bose, Acharya Deva bad u Jawaharlal Nehru ha u snem 1937 kim pdiang ia baroh ki dkhot katei ka jingrwai bad ai jingmut bad tang ki dkhot ba nyngkong bad ba ar ki ia hap bad ka jingiakhih laitluid namar ki kren tang shaphang ka jaka bad ym ia ka niam, katba ki dkhot kiba hadien ki kren shaphang ka jingngeit niam Hindu kiba ym ia hap satia bad kiwei ki jait niam bad Jaidbynriew.
Phewse ha ka 6 tarik u Rymphang 2026, ka sorkar India ka la leh donbor da ka hukum ban rwai lut ia baroh ki dkhot ka Vande Mataram ha baroh ki prokram sorkar bad ki skul. Kane ka jingleh ka sorkar India ka dei ka jingleh donbor da kaba phah rwai jingrwai niam Hindu wat ia kiwei pat ki Jaidbynriew kiba dei ki riewngeit jong kiwei pat ki jait niam. Kane ka pyni ba kane ka sorkar India kaba mynta ka thmu ban pynkylla Hindu ia baroh ki nong India lyngba kata ka ‘process of assimilation’ da kaba phah rwai jubor ia baroh ki dkhot ka Vande Mataram.
Ka Jaidbynriew Khasi kam ia hap bad kam ia don bynta eiei ruh ha kane ka jingrwai Vande Mataram khamtam kito ki dkhot kiba shadien kiba rwai iaroh ia ki blei Hindu. Ka Jaidbynriew Khasi ka don la ki jong ki jingngeit kum ka Niam Tynrai-Niamtre bad niam Kristan. Kine ki niam ki la long doh long snam naduh ki por kulong kumah bad ha shwa ban kha ia ka ri India. Ka jingpynbor ban rwai ia ka Vande Mataram ka long kum ka jingthombor bad thom jubor ia ka riti ka dustur bad ka jingngeit u Khasi.
Ka KSU ka pynkynmaw ba ha ki snem kiba la dep, la don ka hukum ba baroh ki khynnah kynthei ha ki skul kin hap phong da ki jain riam tynrai ki nong ri thor ha ki prokram Independence Day. Ka KSU ka la khanglad ia kane bad buh jingkylli hato tang ki riam tynrai ri thor seh kiba dei shisha ki riam tynrai ha India, hato ka jainsem, ka dhara ki dei ki jaiñ nongwei?
Kumta ka KSU ka kyntu ia ka sorkar Meghalaya, ki ophis sorkar pdeng ba don ha jylla bad ki skul ba kim dei ban pyndem ha khmat ka jingthmu ba sha lyndet ka sorkar India da kaba rwai ia ka jingrwai Vande Mataram. Ki jylla ha ki thaiñ shatei lam mihngi lem bad ki paidbah ki la pyrshah lut ia kane ka hukum bad kum ki Khasi kiba don la ka jong ka snap kaba kyrpang bad ka riti ka dustur kaba skhem ngim dei da leilei ruh em ban pdiang ia kane ka jingleh donbor da ka sorkar NDA. Kane ka long ka kyrwoh na u bah Donald V Thabah, u General Secretary
Khasi Students’ Union.