Shillong: Ka Hynniewtrep Youths’ Council (HYC) haba khublei ia ka jingdap 8 snem ka sorkar Meghalaya Democratic Alliance (MDA), ka la buh dak jingkylli ruh ia ka rukom pynlut ia ka pisa u paidbah na ka bynta kane ka jingrakhe.
Ha ka kyrwoh kaba la pyllait mynta ka sngi, ka 7 tarik Lber 2026, u President ka HYC u bah Roykupar Synrem u la pynpaw ia ka jingsngew khia bad ka jingsngewsih ia ka rukom rakhe ka sorkar ia kane ka jingdap 8 snem ban synshar ha ka jylla. Ka la ong ba la ioh jingtip ba ia ki pandal, ki jingpynriam itynnad bad wat ia ki sopti jacket kaba phong u Myntri Rangbah, bad ki myntri sorkar ki dei ka rong ba iasyriem ia ka lama jong ka party National People’s Party (NPP) haba ka dei ka prokram sorkar.
Ka seng ka la sngew ba kane ka jingleh kam iahap satia bad khamtam haba la pyllong ia kane ka prokram kum ka prokram sorkar ba la pyllut na ka pisa u paidbah. Ka la ong ba ki prokram sorkar kim dei ban pyndonkam bakla ia kiba iadei bad kano kano ka party.
Ka HYC ka la ong ba dei ban don ka jingpyniapher kaba shai kdar ia ki prokram ka sorkar bad ki prokram ki seng sain pyrthei. Ka jingpyndonkam ia ki rong, ki shap ne ki jingpynbeit kiba iasyriem ia ka lama jong ka party kaba synshar, ka la wanrah ka jingmut jingpyrkhat ki paidbah ba la pyllut ia ka pisa u paidbah na ka bynta ban pynkiew skong ia ki kam ka party bad kane ka dei ka kam kaba sngewkhia bha ha ka synshar paidbah.
Ka seng ka la buh jingkylli, hato kum kane ka jingleh ka iahap ne hato ka dei hok ban pynkiew skong ia ka seng sain pyrthei ha ka prokram jong ka sorkar kaba dei jong baroh ki nongshong shnong khlem da khein ia kano kano ka jingiadei seng sain pyrthei.
Ka la kyntu ia ka sorkar ba kan bat ia ka burom bad ban long pdeng haba iadei bad ki kam ne ki prokram sorkar bad ban pynthikna ba kim dei ban long ki rynsan ban pynkiew skong ia ki seng sain pyrthei.
Lah ban kdew ba ka sorkar MDA ka la rakhe ia ka jingdap 8 snem pura ia ka jingsynshar ha ka jylla ha ka 6 tarik Lber 2026 ha Tura, ha kaba u myntri rangbah, ki myntri sorkar, ki MLA kila iashim bynta ha kane ka jingrakhe nalor kiwei pat.
Rakhe dap 8 snem ka MDA da ka pisa paidbah, pynriam ia ka pandal, ka sopti jaket ruh ba iasyriem ia ka NPP: HYC
