Shillong: Ka shnong Umblai ka la pynbna ba khnang ban lait na kano kano ka jingjia, ka shnong ka la mana ban iaid bun ngut ha ka jingkieng doi doi ha wha Kongkhen namar ba ka la synjor bad la rim bha.
U Sordar ka Umblai u la ong ba ka shnong ka la maham ban kynthih ban ryngkoh sha pung na jingkieng sha pung namar ba ka long kaba jrong kumba 120 phut bad ka jinglong ka wah ka long kaba khohruh khohram namar ba ioh jia kumno kumno.
Ka shnong Umblai ka la pynmih ia kane ka jingmaham, hadien ba la iohi ia ka jingdon kiba wan kai sha katei ka jaka, ha kaba kila kynthih najrong jingkieng piaw sha pung bad kumjuh ryngkoh kulmar kaba lah ban wanrah ka jingma ia ki.
Ha kajuh ka por, ka kyntu ia kito kiba wan kai, ba kin pyntip sha ka shnong, ym ban shu wan ban leit iaid sha katei ka jaka khnang ban ioh ia ka jingbatai bad ka jingshngain. U Rangbah Shnong ula ong ba watla ka shnong ka kwah ban pynbha ia kane ka jingkieng doi doi hynrei ka shem jingeh na ka jinghiran pisa.
Ha katei ka wah Kongkhen ka don ruh ka phatok kaba ju pynshitom ia ki briew hyndai kiba leh ia ki kam runar. Watla ki lah ban dei kiba la tbit ban kynthih ne ryngkoh najrong shapoh um hynrei ka shnong ka la sngew khia ba kito kiba wan kai, ki dei ban pyntip ne pan jingbit shwa na ka shnong bad ban bud ryntih ia ki kyndon ba la buh ka shnong ban lait na kano kano ka jingeh.
Mana ka Umblai ban kynthih sha pung, ban iaid bun briew ha jingkieng doi doi ha wah Kongkhen
