Shillong: U MLA ka Mawsynram u bah Oland Sing Suin ula ong ba shisien ka sngi ka jylla Meghalaya kaba ju tip kum ka ri ki lyoh, kan kylla sha ka ri ki dieng jri.
Haba shim bynta ha ka jingiatai halor ka mang tyngka mynta ka sngi hapoh ka iing dorbar, bah Oland Sing ula ong ba kyrmen ba shen ka UNESCO kan ithuh ia ki jingkieng jri kum ki World Heritage Site bad hangta yn sa iohi ia ka jingtuid kiba wankai.
U la ong ba ka Mawsynram kam jngai na ka Sohra ha kaba iadei bad ka kam jngohkai ha kaba ka la nang paw ha kine ki sngi. Ha kajuh ka por, ula kyntu ia ka sorkar ba kan pynsaphriang shuh shuh ban thung dieng jri ha ka jylla khamtam ha East Khasi Hills.
Ka Sohra bad ka Mawsynram ki dei kiba pawnam kum ka jaka jngohkai ha ka pyrthei bad kine ki jaka ki don kajuh ka jinglong kaba iasyriem bad ka la donkam ban pyniasoh ia kine khnang ban khring shuh ia kiba wankai.
U bah Oland Suin ula pynpaw ia ka jingkmen ba hadien ar snem, ki briew kin leit sha Mawsynram kin sa iohi ia ka jingkylla namar ba ka surok kan sa heh bad bha.
Ha kajuh ka por, u bah Oland ula kren ruh halor ka rep ka riang jong ki nongrep bad kumjuh ka jingpynneh ia ka um slap na ka bynta ka jingmyntoi ki briew bad ruh ban iada ia ka mariang.
Ka Meghalaya shisien ka sngi, kan kylla sha ‘ka ri ki diengjri, na ka ri u lyoh’, ong u MLA ka Mawsynram
