Shillong: Katkum jingong u President ka Khasi Students Union (KSU) Laban circle samla Jason Laloo, la kynnoh ba ki samla Khasi kila shah ktah kti ha ki katto katne ngut ki bar jylla ha Laban ha ka miet sngi Nyngkong.
Kane ka la jia ha ka miet 16 tarik Rymphang ha ka por kumba 11 baje ha kaba la kynnoh ba ki mynder kiba lah ban dei ki Muslim kiba don ym duna ia 7 ngut ei ei ki la pyni bor bad ktah kti ia ki Samla Khasi ha ki thain̈ Laban.
Na ka liang kine ki samla Khasi ki bym shym la kwah ban pynpaw kyrteng ki la ujor da ka ejahar ha Laban Police Station da ka jingsynran lang ki dkhot ka KSU Laban Circle. Ia kine ki mynder la kem noh da ki pulit ka Laban Police Station.
U samla Jason ula ong ba ka sorkar ka dei ban pyntreikam Workmen Migration Act ban iada na ka jingma na ka jingwan tyllep ki mynder. Ula kam ba kine ki mynder ki dei ki nongbylla ha kaba kila la kynnoh ba ki pyndonkam da ki tiar ban pynmynsaw ia ki samla Khasi haba ki pyrshang ban kren ba ki wan iaid na ka lynti ka bym dei. U samla Jason ula kam ba la don ruh kiba mynsaw ha kane ka jingshah ktah kti kiba rah da ki wait bad tyrnem.
Ula kyntu ia ka dorbar shnong ban shim khia ban beh noh mardor ia kitei ki mynder kiba la leh ia ki kam pynmynsaw.
Kynnoh ka KSU ba shah ktah kti ki samla Khasi ha ki suba bar jylla ha Laban
