Shillong: U Lat ka jylla u CH Vijashankar ula ong ba ka jylla Meghalaya ka dei kaba kiew sted tam ha ka ioh ka kot bad napdeng ki jylla ha ka ri India, dei tang ka jylla Tamil Nadu kaba don hakhmat ka Meghalaya katba kiwei ki sah lut shadien.
Ia kane ula ong haba kren ha ka dorbar mang tyngka mynta ka sngi. U Lat ula ong ba ka Gross State Domestic Product (GSDP) ka Meghalaya ka la kiew sha ka 9.66 percent ha u snem 2024-25 bad ka Meghalaya ka iai bat ia kane ka jingkiew kaba 10 percent ha kine ki lai snem ba la leit hadien ka jingwan ka khlam Covid-19.
Ka ioh ka kot ka jylla ka la kiew ar shah ha kine ki hynniew snem na ka T.29,508 klur ha u 2018 sha ka T. 59,626 klur ha u snem 2025.
U Lat ula ong ruh ba ka jylla ka la buh thong ban kot sha ka jylla kaba bit kaba biang ha ka ioh ka kot ha u snem 2032.
Ha kine ki snem, ka jylla ka la wanrah haduh T.1800 klur ia ka jingbei pisa na ki riew shimet nabar bad ka la buh thong ban kiew sha ka T.8000 klur ha u snem 2032 bad kan pynmih kam haduh 50,000 tylli. Ka jingwanrah ia ka jingbei pisa nabar kum ka Varun Beverages Bollttling Plant kaba T.330 klur ka la ai kam kumba 500 ngut ki briew bad kumjuh ka jingwanrah ia ka hotel ba ryngkat kyrdan ha ka pyrthei ka Taj Umiam Resort and Spa kaba T.300 klur kan ai kam shibun ia ki samla ka jylla nalor kiwei ki projek ha ka jylla kiban sa urlong ha kine ki sngi ban wan.
Knieh lut ka Meghalaya lait noh tang ka Tamil Nadu ha jingkiew sted ha GSDP, ong u Lat
