Shillong: U MP ka Shillong u Dr. Ricky Andrew J Syngkon ula ai jingthoh ha u myntri ka tnad iada mariang ka sorkar India u Bhupender Yadav ban pynsangeh shwa ban ai jingbit ia ka kompeni M/s Shree Cement Limited, kaba la thmu ban seng karkhana ha Daistong, East Jaintia Hills.
Ha ka shithi kaba u Dr. Ricky ula aiti ha u myntri, u la ong ba ka jingpyllong ia ka jingsngap paidbah ne public hearing kam long kaba iaid beit ha kaba ka la don ka jingkhang lad ia ka jingshim bynta ki paidbah. Ka la don ruh ka jingbyrngem bad khang lad ia ki paidbah ban leit iashim bynta ha katei ka jingsngap paidbah bad kam don ka jingiasyllok kaba don jingmut bad ka jingiathir bad ki paidbah.
Kane kan ktah ia ka mariang khamtam ba ka jylla Meghalaya ka dei kaba kdup ka Sixth Schedule ha kaba ki jaka ki dei jong ki riew shimet, ym dei jong ka sorkar bad ka ain ban iada ia ki trai jylla, ka Meghalaya Land Transfer Act.
Halor kane, u Dr. Ricky ula kyntu ia u myntri ban pynsangeh ban ai jingbit ia kane ka kompeni bad dei ban thung ia ka jingtohkit kiba iadei bad ka jingsngap paidbah, ka jinglong trai ia ki jaka bad ka jingiadei bad ka mariang.
Ha kajuh ka por, ki nongshong shnong ka Daistong ka East Jaintia Hills district kynthup u bah Bunlang Pyrngap, bah Reachingson Siangshai ki la iathuh ba ki nongshong shnong ki la pynpaw ia ka jingpyrshah ia ka pyllong ia ka jingsngap paidbah bad ka jingai jingbit ne NOC ka shnong ia kane ka kompeni khlem ka jingmynjur ki paidbah.
Kila ujor ruh sha u Myntri Rangbah duh ka ri u Narendra Modi, u myntri ka tnad kam pohiing u Amit Shah, bad sha u Secretary bad sha u General Manager jong ka Ministry bad sha u MP ka Shillong u Dr Ricky Syngkon bad sha ka Meghalaya Human right Commission. Ki la ai jingthoh ruh sha u nongialam ka liang pyrshah u Dr Mukul Sangma bad sha ki nongialam ka VPP.
Pynsangeh shwa ban ai jingbit, tohkit shwa ia ka M/s Shree Cement, ai jingthoh u MP ha u myntri
