Shillong: Ka jingpynnoh jar dohkha kaba shisien shi snem ka shnong Shella, ka shongshit bha na ka jingiashim bynta ki nongshong shnong. Ia kane jingpynnoh jar la ju leh naduh hyndai hynthai ha katei ka shnong bad ka dei ruh shi bynta kum ka tamasa kaba iadei bad ka riti dustur jong ki nongshong shnong.
Ha katei ka wah Shella, ki don bun ki jait dohkha bad ha kane ka jingpynnoh jar, la don ruh kiba ngat ia u kha wawar uba heh kynshieng.
U Wahadadar ka Shella Confederacy u bah Sotish Youroin u la ong ba ka shnong ka ju pynbna ban pyllong ia kane ka tamasa pynnoh jar sha baroh ki nongshong shnong.
Shi sngi shwa ban pyllong ia kane ka jingpynnoh jar, ki leit sah lypa sha rud wah ban pynkhreh ia ki jar ban pynap dohkha bad ha ka sngi kaba bud ha ka por mynstep ha ka por 7am ki sdang ia kane ka tamasa.
Ki don kiba ioh dohkha shibun kiba kham bha bok hynrei lada kim nang ban pynap bha, ki lah ban ioh tang khyndiat. La ju pyllong ia kane ha u bnai Rymphang ha ka taiew ba nyngkong ne baar.
U bah Roykupar Synrem u la ong ba ki rangbah ki ju iashim bynta ha ka tong dohkha, katba ki longkmie pat ki pynkhuid ki shet ban ioh ban iabam bad don kiba die ruh haba ki ioh shibun.
Shongshit ka pynnoh jar ha Shella, ngat u kha wawar ruh
