Shillong: U symbud myntri rangbah ka jylla u bah Sniawbhalang Dhar ula ong ba ka jingjia ha Thangsko ka long kaba sngewsih haduh katta katta kaba la wanrah ia ka jingduh ki mynsiem briew.
Haba phah ia ka khubor sngewlem sha kiba kynduh ia ka apot, u bah Sniawbhalang u la ong ba dei ban kynmaw ba ha kum kane ka por, ym dei ban ialeh ia ka politik.
U la ong ba ka sorkar ka la shim khia mardor ha kaba ka la phah ia ki bor ban leh ia kaba donkam khamtam ban pyllait im ia kiba kynduh ia ka jingjia bad ha kajuh ka por, ka sorkar kan ym aili ia kiba donkti ha kane ka kam beain.
U Symbud myntri rangbah ula ong ba ka lah ban don ka jingtih dewong beain hangne hangtai hynrei na ka liang ka sorkar kan shim ia ka sienjam kaba tyngeh ba ka ain kan sa pynshitom da kaba tyngeh ia kiba donkti.
Ha kajuh ka por, ula ong ba ka sorkar jylla ka dang iakren ia ka sorkar pdeng ba kan pynjynsur ia ka kyndon ban tih dewiong da ka juk stad saian namar ba ka jingbuh kyndon 100-hectare ka la heh palat bad dang iakren ban pynjynsur ia kane ka kyndon namar ba kiba rit kiba ria, ka long kaba eh ban leh ia kane ka kam.
Lah ban kdew 30 ngut ki briew kila iap hadien ba ka krem ba ki tih dewiong beain ka la bthei ha Mynsngat-Thangsko, East Jaintia Hills ha ka 5 tarik Rymphang 2026.
Wat ialeh politik ia ka jingjia ha Thangsko, ong u bah Sniawbhalang
