Shillong: Ka jingdon kiba khlad na ka jingbthei ka krem dewiong beain ha Thangsko, East Jaintia Hills ka la kiew sha ka 28 ngut haduh mynta ka sngi.
Kane ka long hadien ba la iap biang sa uwei uba kyrteng kum u Raju Tamang ula khlad ha jaka sumar ha NEIGRIHMS mynta ka sngi.
Lah ban kdew ba mynta ka sngi u Deputy Commissioner u Manish Kumar, IAS bad u Superintendent of Police (SP) ka East Jaintia Hills u Vikash Kumar, IPS kila wan hajir ha ka Meghalaya High Court halor ka jingjia ha Thangsko, East Jaintia Hills.
Ka High Court, Meghalaya ka la khot hajir ia ki bor district hadien ba 27 ngut ki briew kila iap na ka jingbthei ka krem tih dewiong beain ha Mynsngat-Thangsko, East Jaintia Hills ha ka 5 tarik mynta u bnai.
U SP u Vikash Kumar ula ong ba ki dang ap ia ka hukum na ka High Court kaban sa pynmih mynta ka janmiet.
U SP ula ong ba ka jingiakhun ban wad ia kiba dang don sha krem ka dang iaid da ki briew ka SDRF bad NDRF ha katei ka jaka bad ha kajuh ka por, ki pulit kila kem ruh ia ki katto katne ki briew halor kane ka jingjia.
Ka jingtohkit ka dang iaid halor kane ka jingjia bad ka jingwad ia ki briew shapoh krem ka shong katkum ka jingsngew donkam ki SDRF bad NDRF.
Sha ka 28 ngut, kiew ka jingiap na ka jingbthei ka krem dewiong
