Shillong: Ka Voice of the People Party (VPP) ka la dawa ba u Myntri Rangbah ka jylla u Conrad K Sangma u dei ban hiar shuki noh namar ba ka paw shai ba ka sorkar kam lah ban tehlakam ia ka jingtih dewiong beain ha ka jylla.
Kane ka jingdawa ka VPP ka long hadien ba 25 ngut ki briew kiba la iap ha ka jingbthei ka krem tih dewiong beain ha Thangkso, East Jaintia Hills ha ka 5 tarik Rymphang 2026.
Haba kren lyngba ka video, u nongaiktien ka VPP, u bah Batskhem Myrboh ula ong ba ka sorkar MDA-2 kam lah shuh ban set ia ka jingshisha watla ka la pyrshang bunsien ban len ba kam don ka jingtih deiwong beain ha ka jylla.
U bah Batskhem u la ong ba watla ka sorkar ka don ki pulit kiba biang hynrei ka jingtih dewiong beain ka dang iaid bteng bad kum ka seng kumba la pynpaw u President ka VPP bah Ardent Miller Basaiawmoit, u myntri rangbah u dei ban shim ia ka jingkitkhlieh bad u dei ban hiar shuki noh namar ba ka paw ba um lah ban synshar ia ka jylla ha ka lynti kaba dei.
‘Hiar shuki noh Conrad, la lehrain khait ka Meghalaya’, kynther ka VPP ba iap 25 ngut ha krem dewiong
