Shillong: Watla bunsien ka sorkar jylla ka ju iada ba ka la tehlakam ia ka jingtih dewiong beain hynrei ka jingshisha ka paw pen ryngkew bluit mynta ka sngi, ha kaba 18 ngut ki nongbylla tih dewiong beain kila iap ha krem na ka jingbthei ka krem tih dewiong ha Maynsngat, Thangskoo, East Jaintia Hills.
Kane ka jingjia ka la pynkhynniuh ir ia ka jylla bad ka ri India baroh kawei ba ka jingtih dewiong beain ka dang thnem bha ka Meghalaya.
Halor kane ka jingjia, u myntri rangbah ka jylla u Conrad K Sangma u la pynbna ban ai jingiarap mar 3 lak ia kiba iap.
Katba u myntri rangbahduh ka ri u Narendra Modi ula pynbna ban ai jingiarap 2 lak ia kiba iap bad 50 hajar ia kiba mynsaw na ka Prime Minister’s National Relief Fund (PMNRF).
Kane ka jingiap ki nongbylla ka la jia mynta ka sngi ha ka por 11 baje eiei mynsngi hadien ba ka kdem tih dewiong ka la bthei kynsan jrain na ka jingpyntbhei bom siat maw ne dynamite.
Ki pulit ryngkat ki SDRF bad NDRF ki dang bteng ban wad ïa ki nongbylla ba sahkut ha katei ka krem.
U Conrad ula phah ia ki 2 ngut ki myntri kynthup u bah Lahkmen Rymbui bad u bah Wailadmiki Shylla ban leit jngoh sha katei ka jaka kaba don ka jingjia.
Ula bthah ruh ia ki pulit ban shim kam kaba tyngeh ia kiba donkti ha kane ka kam.
Paw jingshisha ia ka jingtih dewiong beain, iap 18 ngut ba bthei ka krem
