Shillong: U Myntri Rangbah ka Meghalaya uba dei ruh u National President ka NPP u Conrad K Sangma ula kyntait ba ka NPP ka la iapait kumba la mih khubor ha jylla Manipur.
Haba kren mynta ka sngi halor ka jingkam ba pait ka party ha Manipur, u Conrad ula ong ba ka NPP kam don eiei ka jingiapait hynrei ki don katto katne ki briew kiba la rai ban mih na ka party, bad kane ka jia ha ka sain pyrthei bad ha kano kano ka jylla. U la ong ba ka NPP ka sah bad kam don kano kano ka jingpait.
U la ong ruh ba kiba thaw ia ka party thymmai, kam pat don jingithuh na Election Commission bad ym don eiei ban kren ia kata namar ba ka shong ha ki.
U Conrad ula ong ba ia ka NPP la thaw ha Manipur bad ka la jan iap ha kito ki snem hynrei dei ha 2012, ba la shimti u Late PA Sangma ban ialam ba la lah ban pynkhie im bad mynta la ithuh ia ka NPP kum ka National Party ha ka ri India ha kaba u Conrad Sangma u dei u President.
Ha kajuh ka por, u la ong ba la ar snem ki paidbah ka Manipur kila syllang na ka jingiaumsnam kaba la ialam sha ka jingiap da ki spah bad phet shnong da ki hajar. Kane ka jinglong jingman ka la pyllong ia ka NPP ban weng ia ka jingkyrshan na ka sorkar kaba ialam ka BJP.
Kum ka seng sain pyrthei hadien ba la sdang wan phai biang ka jingsuk, ka la sngew dei ban kyrshan ia ka sorkar thymmai.
Ka NPP kam pait, katto katne ki phet hi, u Conrad Sangma u dei u Nation President: Conrad
