Shillong: U myntri ka tnad ka koit ka khiah ka jylla u bah Wailadmiki Shylla ula ong ba ka sorkar ka dang aiti ha u consultant ban wad bniah ia ki jingpyntreikam kaba biang ban pyniaid ia ka 108 Emergency Ambulance ha Meghalaya.
Namar kane ka daw, ka sorkar kam pat lah ban shim rai eiei tad haduh ban ioh ia ka jingai jingmut na u consultant kaba ka la dep aiti halor kane.
U bah Wailadmiki ula ong ba ka sorkar ka dang ap ia ka kaiphod na u consultant halor kane bad hadien kan sa bishar kaei ka lynti kaba biang tam ban pyniaid.
Kham mynshwa, ki nongtrei hapoh ka Meghalaya EMRI Workers’ Union (MEMRIWU) kila dawa ban shimti noh ka sorkar ia ka jingpyniaid bad ban siew ia ka tulop kaba don burom namar ba kila kam ba kila shah khnoit ha ka jingpyniaid ka kompeni ha kaba kim don ka jingshngain ha ka kam nalor ba ki hap ban trei satar.
Ka jinglong jingman ka la nangjur hadien ba kila pyllong ruh wat ia ka jingsangeh trei hynrei kane ka kam ka dang sahteng namar ba ka sorkar kam pat lah ban shim rai.
Dang phah wad bniah ha u Consultant ia ka 108, ap ban ai kaiphod sha ka sorkar
