Shillong: U Chief Electoral Officer (CEO) ka Meghalaya u BDR Tiwari mynta ka sngi ula ong ba ka jingioh khusnam ka tnad pyniaid elekshon ka East Khasi Hills kum ka ‘Best Election District’ Award na ka sorkar India, kan long kum ka jingai mynsiem shuh shuh nangne shakhmat.
Ha ka jingrakhe ia ka National Voters’ Day, ka East Khasi Hills District ka la ioh ia ka khusnam kum kawei na ki district ha ka ri, kaba tbit tam ban pyniaid ia ka elekshon.
Ia kane ka khusnam la pdiang ka Deputy Commissioner ka kong Rosetta Mary Kurbah na ka President ka ri, ka Droupadi Murmu ha ka jingrakhe ia ka National Voters’ Day ha Manekshaw Centre ha New Delhi ha ka sngi u Blei.
Ka khusnam ka dei namar ba ka district election ka la lah ban pyniaid ia ka elekshon ha ka rukom kaba biang bha ha ki elekshon MLA bad MP.
Lem bad ka East Khasi Hills, kiwei ki district ha ka ri kiba ioh khusnam ki long ka Nuapada district ha Odisha bad Purnea district ha Bihar kiba ioh ia kane kajuh ka kyrdan.
Tbit tam ka East Khasi Hills ban pyniaid elekshon, ioh khusnam na ka sorkar India
