Shillong: Ka Lum Sohpetbneng Committee, Seng Khasi Kmie ka pyntip ba ka “Kiew Pyneh Rngiew” ba shisien shi snem sha kliar jong u Lum Sohpetbneng, kan long ha ka 1 tarik u Rymphang, 2026.
Ha katei ka sngi yn sdang ia ka lehniam ha ka khyrdop ha ka por 6 baje mynstep bad ka ban bud pat ha duwan ba kyntang jong u Lum naduh ka por 8 baje mynstep ia ka ban pyndep da ka Kyhun ki Tymmen ki San jong ka Seng Khasi Kmie.
Lyngba une u kyrwoh, ka Seng ka ia wer ia baroh ki parakur parakha ba kin wan ia shim bynta sha katei ka lehniam ba shisien shi snem. La pyntip ruh ia baroh ki ban wan ia shim bynta ba yn ym shah ban kiew da ki Bus sha jrong bad yn khang ban kiew kali sha jrong Lum hadien ka por 1 baje mynsngi. Ia ki kali ba hiar pat yn pyllait naduh ka por 2 baje mynsngi. Shuh shuh la mana ruh ban buh basa ne die madan ha shi lynter ka surok naduh ba ieng ki iing jong ka Seng Khasi (Swadesh Darshan) shaduh sha kliar jong u Lum Sohpetbneng. La kyrpad ia baroh ban ia trei lang bad ki nong pyniaid khang ba katei ka sngi kan long kaba iaid beit iaid ryntih khamtam bad ka jingiaid bad pynieng ia ki kali kiba wan.
Shuh shuh, khnang ban ai lad ia baroh, ka Seng Khasi Kmie ka pynbna ruh ba ka duwan jong u Lum Sohpetbneng kan plie man ka sngi naduh ka sngi kiew eh rngiew haduh ka 15 tarik u Rymphang, 2026 naduh ka por 8 baje mynstep haduh 1 baje mynsngi ban ai lad ia ki paidbah ki ba kwah ban leit duwai.
Kane ka long ka kyrwoh na u bah S. Bareh, Secretary, Lum Sohpetbneng Committee.
Ka duwan u Lum Sohpetbneng kan plie man ka sngi naduh ka sngi kiew eh rngiew haduh ka 15 tarik u Rymphang
