Shillong: U heh pulit barim ka jylla uba dei ruh u nongaiktien ka BJP Meghalaya, u bah Mariahom Kharkhrang ula ong ba ka sorkar ka dei ban bthah kaba tyngeh ban kerkut bha ka khappud ka Meghalaya bad ka Bangladesh.
U bah Kharkhrang ula kyntu ia ki shipai Border Security Force (BSF) ban pynkhlain ia ka jingpahara ha khappud ryngkat ki tiar ki tar kiba katkum kane ka juk stad mynta khnang ban tehlakam ia ka jingwan rung ki briew nabar.
Katkum ka jingong u nongaiktien ka BJP, ka jingiadei ka India bad ka Bangladesh ha kine ki khyndiat snem, ka la sniew bha ha kaba ula kynnoh ba ka Bangladesh ka la thmu ban kthong ia ka India khamtam ha kaba iadei bad ka thain shatei lammihngi ka India.
Ka jylla Meghalaya ka la don khappud haduh 433 km bad ka ri Bangladesh bad kane dei ka khappud kaba syier bha na ka jingwan rung beain ki briew na Bangladesh.
Ym tang katta, ula ong ba wat ki seng lehnoh ruh mynshwa, ki kharoi bha ha ri Bangladesh bad ka sorkar kam dei ba kane kan jia biang.
U la ong ba ka sorkar jylla bad ka sorkar pdeng ki dei ban iatrei synrop lang ban pynthikna ba ka ri Bangladesh kam ioh lad ban pynkharoi ia ki kynhun kieng atiar bad ula bynrap ba ka jingpahara bad phikir ia ka thain shatei lammihngi ka India ka dei kaba kongsan bha.
Kerkut bha ia ka khappud bad ka Bangladesh, ong u heh pulit barim
