Shillong: Ka sorkar jylla ka la sngew kmen hadien ba ka la lah ban pynkynriah ia ki nongdie madan na ki ar tylli ki jaka kiba kynthup na Khyndai Lad bad na khmat ka Civil Hospital, Shillong.
Kiba dang sah mynta ban pynkynriah kin dei ha Laitumkhrah, ha Jail Road bad kiwei ki jaka ha nongbah Shillong.
Ha ka kyrwoh, u Commissioner & Secretary ka tnad Urban Affairs ula ong ba ka sorkar jylla ka la lah ban pynkynriah ia ki 29 ngut ki nongdie madan na khmat ka lynti ka Civil Hospital, Shillong sha ka jaka kaba la shna bha ha phyllaw ka PWD ha Barik.
Ki nongdie madan kila pynpaw ia ka jingkmen ban ioh shong die jingdie ha jaka kaba thymmai kaba kylluid, bad kaba lait na u slap ka lyer bad ka jingthang ka sngi.
Ka jingpynkynriah ia ki nongdie madan na khmat lynti ka hospital ka la wanrah ruh ka jingkylluid ia ki paidbah ba iaid ba ieng bad ia ki kali ambulance.
Ia kane ka sienjam ka sorkar, la iaroh ruh ki paidbah naduh ki nongdie madan.
Kane ka dei ka sien kaba ar ba ka sorkar kala shim ia kane ka sienjam ha kaba nyngkong ka la pynkynriah na surok ha Khyndai Lad.
U Commissioner & Secretary ula ong ba kane ka sienjam kan bteng ha kiwei ki jaka ka nongbah, na ka bynta ban peit ia ka jingbha jingmiat ki nongdie madan bad kumjuh ka jingshngain jong ki paidbah kiba iaid ba ieng.
Kmen ka sorkar ba la dep pynkynriah shwa 2 tylli ki jaka ia ki nongdie madan, sah sa ha Laitumkhrah, Jail Road bad kiwei
