Shillong: Ar ngut ki briew kila shah kem halor ka jingkynnoh ba donkti ban pynbthei bomb IED ha Dhar Company ha Shymphlong, East Jaintia Hills dang shen.
Katkum ki pulit kine kiba shah kem ki dei ki dkhot ka seng Hynniewtrep National Liberation Council (HNLC) bad la tip kyrteng ia ki kum u Issei Sungoh 29 snem, uba dei u nongsuhbuit uba dei na Mynso B, West Jaintia Hills bad uwei pat u dei u Embha Ladong 25 snem uba na Shymphlong, East Jaintia Hills.
La kem ia kine halor ka jingpynbthei bomb IED ha phyllaw ka Dhar Construction Company kaba don ha Shymphlong, ha ka 15 tarik Nohprah 2025, East Jaintia Hills.
U SP ka East Jaintia Hills u u Viskash Kumar u la ong ba ia u Issei Sungoh la ju khot sin kum u Sei ne Bah bad kila shah kem ha ka jingkhynra ki Pulit ka EJH bad WJH.
U Issei Sungoh u dei u dkhot ka HNLC uba la thwet jur da ki Pulit namar ka jingdonkti ha ka jingpynbthei bomb IED ha Police Reserve, Khliehriat bad kiwei kiwei ki kam be-ain.
U SP ula buh ruh ka jingkyrpad ia kino kino ki briew kiba don jingtip shaphang kiwei pat ki runar ba donkti ha kane ka kam beain, ba kin pyntip mardor sha ki Police Station ba marjan bad ia ka kyrteng bad jaka jong ki yn sa buhrieh bad yn sa ai buskit ruh kumjuh.
Kham mynshwa, ki Pulit kila kem ia ar ngut ki briew ba donkti ha kane ka jingpynbthei bomb IED kiba kynthup ia u Richard Suchen (31) bad u Pynshaitbor Syih (45).
Kem ki pulit sa 2 ngut halor ka jingpynbthei bomb IED ha phyllaw ka kompeni Dhar
