Shillong: Ka Khasi Students Union (KSU) ka la maham ia ka Meghalaya Public Service Commission (MPSC) ba ka dei ban pyntreikam noh ia ki rukom treikam ba thymmai hapoh shi taiew.
Lada ka MPSC kam leh eiei, ka KSU kam banse ban pyni da ki kam kiba khor syndon namar ba ki samla ka jylla kila thait ban ap ia kajuh shi kajuh khlem don jingkylla.
Haba kren sha ki lad pathai khubor, u Chairman ka Employment & Monitoring cell ka KSU CEC, u samla Rueben Najiar ula byrthen ba ka KSU ka la shlei miar ha ryndang ka jingiai shah iai ap bad kam sngew don por shuh ban iakren ia kajuh shi kajuh khlem mih kam eiei.
U la ong ba ka seng ka la iaid da ka lynti kaba jai jai ha ki sngi baroh hynrei lada kim leh ia ka kam, ka seng kan sa leh da ki kam kiban pynpeit mat kdar ia kiba don ha ka shuki, ban mait ia ki kam buit tuh ka MPSC kaba la ktah bad duh ka jingshaniah ia ki samla wad kam ha ka jylla.
Da ki kam ba khor syndon, byrngem ka KSU ia ka MPSC lada ym leh hapoh shi taiew | ki samla kila jlep kajuh shi kajuh
