Shillong: U myntri rangbah ka jylla u Conrad K. Sangma ha kane ka sngi Thohdieng ula ong ba ka sorkar ka dang wad ia ki lad ki lynti ha kaba iadei bad ka jingpyllait ia ki nonghikai kiba shah pynngat tah sia lieh ha ka jyrsieh thungkam ha ka tnad pule puthi ha ka jylla ha u snem 2008-09.
U Myntri rangbah ula ong ba ia kane ka kam, dang pule bniah u Chief Secretary ka jylla ia ki lad ki lynti kiba lah ban leh.
U la ong ba kano kano ka rai kaban shim ka sorkar, kan long katkum ki jingbthah ka kashari.
Kane ka jingpynshai u myntri rangbah ka long hadien ba ka High Court Meghalaya ka la pynksan ia ka kong Ampareen Lyngdoh bad u Director ka tnad pule puthi ha kitei ki snem u JD Sangma halor kane ka mukotduma.
U la ong ba kumba 140 ngut eiei ki nonghikai kiba la bteng biang ia ka kam nonghikai hadien ba la shem ba kim donkti ha ka kam thungkam beain bad lada don ka jingshisha ba ki shah pynngat bakla, ka sorkar kan pynbeit ia kane.
Lah ban kdew ba ka seng Hynniewtrep Youth Council ka la ujor sha u myntri rangbah halor kaei ka lawei jong kito ki nonghikai kiba shah kynthup ha ka kam shah thungkam beain hadien ba kiba shah kynnoh hakhmat duh kum ka myntri bad u Director ka tnad puthi puthi, kila ioh ia ka jingpynksan na ka kashari.
Dang pule bniah u CS halor ka jingpyndam ka kashari ia ka mukotduma sia lieh, ong u Conrad
