Shillong: Ha ka 6 tarik Kyllalyngkot, ka Raid Mawshuit kawei na ki Raid ha 12 Shnong, ka la pyndep ia ka jingleh niam leh rukom ban kyrkhu kyrdoh ia ka jinglong Syiem u Paiem Marremdor Syiem jong ka Hima Sohra.
Katkum ka riti dustur ka Hima, uno uno u syiem ka hima Sohra uba la kiew khet Syiem, u dei ban leit iuh kjat shwa ha ka Raid Mawshuit, kaba dei kawei na ki Raid kaba ju pyndep ia ka niam ka rukom.
U Syiem Marremdor Syiem ryngkat ka Syiem Sad, ka mei ‘yiem Costlymai Syiem, bad ka iing ka sem kila hiar leit iuh kjat sha ka shnong Nongbah Mawshuit hapoh ka Raid Mawshuit ha ka jingsakhi lang ki paidbah ka Raid, ki sordar, ki myntri ryngkat ki paidbah.
Ki riew tymmen riewsan kila pyndep ia ka jingleh ia ka niam ka rukom ha ka ïing trep kaba la shna hadien la pynphong jain spong kum u Syiem.
U paiem Marremdor ula nguh la dem ia ka Raid Mawshuit bad baroh ka 12 Shnong baroh kiba la pynskhem, pynsum pynsleh ia u kum u Syiem katkum ka riti dustur. Katkum ka riti dustur, dei hadien ba la dep ia ka jingleh niam leh rukom, ka nguh ka dem na Raid Mawshuit ba un long u Syiem ba pura, ia kaba la pyndep mynta ka sngi.
Kum u syiem u u kmie, u la pynthikna ban ai ka jingsynshar kaba khuid, kaba khlem shaliang iano iano na ka bynta ban pynbit pynbiang ia ka Hima bad ki khun ki hajar. Ula pdiang sngewbha ruh ba kin ai jingmut ai buit ia u ban pynbha ia ka synshar khadar hapoh ka Hima.
Ia u Marremdor la jied bad la pynskhem ka dorbar hima hadien ba la mynjur lang baroh na ka iing ka sem khlem kano kano ka jingialeh pyrshah, ba un kiew sha ka khet syiem ka Hima hadien ba la khlad noh u syiem Freeman Sing Syiem ha ki bnai ba la dep.
La ioh ruh ia ka jingkren na u myntri Nongrum, u Secretary ka Hima Sohra bah BV Rymmai, u Secretary ka Raid Mawshuit bah Kyntiew Khongshei, ha ka jingdon lang u sordar bah Jling Shrieh bad kiwei kiwei.
Kum ka jingkmen bad ka jingkyrkhu kyrdoh ia u Syiem, ka Raid Mawshuit ka la pyllong ruh ia ka jingpyni riti, ha kaba u Syiem ula shim bynta ban rwai laisien laiwat katba ka Syiem Sad ka la iashim bynta da kaba iashad lang bad ki paidbah./
Dang shen, ka KHADC ka la thung Acting ia u Myntri ka Hima u bah Mynjurlang Majaw jong ka Hima Sohra, da kaba kyntait ban ai sanad ia u syiem Marremdor.
Pyndep ka Raid Mawshuit ia ka niam pynskhem ia u Syiem Hima Sohra| rwai u Syiem, shad ka Syiem Sad
