Shillong: Ka seng Hynniewtrep Youths’ Council (HYC) kala pynrem jur ia ka jingkmen tohhoh u symbud myntri rangbah ka jylla u bah Prestone Tynsong halor ka jingkren jongu dang shen ba ka sorkar pdeng ka la ai ksai ban pynrung ia ki kyndon kiba long syriem kum ka Inner Line Permit ha ka Immigration and Foreigners Act 2025.
Ha ka kyrwoh u President ka HYC bah Roykupar Synrem ula ong ba ka jingkren u symbud myntri rangbah ka dei tang ka jingphai kynriah ban pyntlot bad pynslem ia ka jingdawa ia ka jingpyntreikam da ka ILP kaba shi number ne original.
Ka HYC ka kyntait ia kane ka aiñ ILP ar numbor hynrei ka dawa ba dei ban ai beit da ka ILP shi nombor ne original ILP..
Ka HYC kala ong ba ki paidbah ka Meghalaya kim dei ki tasngeng ban shah pynngop ha kata ka ain kaba ong kum ka ILP. Kala ong ba lada ka sorkar ka don ka jingthmu ba shisha ban iada ia ki trai muluk, ka dei ban ai beit da ka original ILP ban ia kata kawei ka ain ar nombor, ka bym don eiei ka jingshai ka jingpynthikna bad kaba dang shu mutdur.
Ka la ong ba kano kano ka ain ka bym pynskhem pura ia ka bor ban pyrkhing ia ka jingrung ki briew, ka jingsah, ka jingiohkam, ka jingsengkam ne khaïi pateng bad ka jingbuhai shnong ki bym dei trai muluk, ka dei ka jingshet kylla bad leh pyrdet ia ka jaitbynriew. Ki kyndon kiba shu thmu ban bsuh pateng ha kawei ka ain, kan ym lah ban tehlakam ia ka jingwan ki briew nabar.
Ka HYC kala maham ba kane kan iai bteng, ka pyni ba ka sorkar ka shu kwah ban pynkulmar ia ki paidbah namar ka sorkar kam don mon satia. Ka la dawa na ka sorkar jylla ba kan ai ia ka jubab kaba shai, hato ka jylla Meghalaya kan ioh ia ka ILP shi nombor hapoh ka Bengal Eastern Frontier Regulation, 1873 ne em? Lada kim ai da ka ILP shi nombor, ka dei ka jingshet bad dung ia ka jaitbynriew.
Ka HYC kala byrthen ba ka sorkar ka shukor ia ki paidbah, ka seng kan pyllong ia ka jingiakhih kaba jur ha ka jylla.
Ai da ka ILP shi nombor, ym da ka ain kaba dang shu mutdur, ong ka HYC ia ka sorkar
