Shillong: Ki sengbhalang bapher bapher hynne ka sngi ki la kynmaw burom ia ka sngi iap ba 163 jong u Woh Kiang Nangbah da kaba pyllong ia ka jingsngap jar kaba ar minit bad buh syntiew ha u motdur ba shi rynieng ba ieng hajan Shillong Civil Hospital.
Ha kane ka sngi la ioh sngew ia ka jingkren na ki nongialam sengbhalang bapher bapher kynthup ka Khasi Students Union, Hynniewtrep Integrated Territorial Organisation (HITO), Federation of Khasi Jaintia & Garo People (FKJGP), Nort East Students organisation (NESO), nalor kiwei de.
U President ka FKJGP u Bah Dundee Khongsit, u Chairman ka NESO u bah Samuel B Jyrwa, u President ka KSU bah Lambokstar Marngar, bad u President ka HITO u bah Donbok Dkhar kila phira ia ka jingma ia ka jaitbynriew na ka jingtyllep ki poiei ki poiwir ban buhai shnong ha kane ka jaitbynriew.
Ki nongkren kila pynsawa ia ka sur jong ka Inner Line Permit (ILP), kaba dei ka mat kaba la dawa la slem bah kum ka jaitbynriew ban tehlakam ia ka jingwan ki briew nabar.
Kila ai mynsiem ia ki samla ba kin phrang ialade ban mih biang kum ki Kiang Nangbah, ki Tirot Sing kiban iada ia ka jaitbynriew na ki nongshun khamtam ha kine ki sngi, ka la don ka jingbyrngem ban ot noh ia ka ryndang syiar ka North East ban pynngam ia ka North East sha ka Bangladesh.
Kaba sngewthamula ka long ba mynta ki mynder naduh na Bangladesh ki kren bein bad ki la byrngem ba kin wanrung tuh, hynrei ka sorkar jylla haduh mynta kam shym la ai ia ka jylla ia ka ain ban iada ia ka jaidbynriew.
Kila ther ia ka sorkar India ba lada ka burom ia u Kiang Nangbah, ia u Tirot Sing, balei pat kam ai ia ka ILP, ka ktien Khasi ha ka khyrnit ba phra ka riti synshar ka ri.
Ka Bangladesh ka byrngem ban ot ia u ryndang syiar ka NE|Sawa ka ILP ha ka sngi iap 163 u Kiang Nangbah
