Shillong: Ka ïingmane ka Balang Presbyterian ha Nongsawlia, Sohra kaba la iaid ban kot sha ka 200 snem, ka la khring ia ki nongwankai kylleng ka pyrthei.
Ia kane ka ïingmane la tei ha u snem 1846 eiei ha u lum uba don ha katei ka jaka hynrei la pynkhyllem noh u jumai bah ha ka snem 1897 bad la tei biang ia ka ha u snem 1898 ha kawei ka jaka kaba don mynta, kham pajih na kaba rim mynshwa.
Ha ka jinghiar sha katei ka thain, la ioh ruh ban iakren ia kiba wankai nabar kiba la pynpaw ba ka Sohra ka dei kaba bang bad kaba sngew tynnad bha, naduh ka riti dustur ne kolshor, ka riam ka beit, ka jinglong ki briew bad kumjuh ka suin bneng.
Shwa ban wan ki phareng, ia ka Nongsawlia, la tip kum ka Nonglba hynrei hadien ba la sah ki phareng, ka la mih kyrteng noh kum ka Nongsawlia. Ka daw ka dei namar ba ki Khasi ha katei ka por, ki khot kyrteng Nongsawlia namar ba ki phareng ki sah doh sar dur.
Ha ka jingiakren bad ki nongsharai Balang Presbyterian Nongsawlia, kynthup u Pro Pastor Frederick Pde, u Rangbah Balang FN Wahlang bad Tymmen Basan PR Laloo, kila batai ba u sahep Thomas Jone bad ka lok jongu, ka Annie Jones, kiba wan naduh ri Wales, ki dei nongbet symbai ia ka Balang Presbyterian ha ka ri Khasi-Jaintia kumba ka la roi haduh mynta.
U Thomas Jones um wan tang ban hikai ka niam Khristan hynrei ula wanrah ruh ia ki dak thoh Roman ha ka jaitbynriew Khasi bad kila wan iuhkjat nyngkong ha Sohra ha u snem 1841.
Na ka bynta ka Balang Presbyterian, kiei kiei kiba nyngkong ki dei na Sohra naduh kiba kylla Khristan, ka jingthung dieng phna ba nyngkong, ki nongsharai Balang nyngkong bad kiwei kiwei.
Ka ïingmane kaba tei nyngkong kaba la khyllem noh ha u jumai bah 1897, dei ha u lum hajan kaba don mynta hi hynrei la tei biang ia ka ha 1898, ha ka jaka kaba ieng mynta kham pajih na kaba mynshwa.
Ha kaba iadei bad ka jingrakhe ia ka Khristmas, ka Balang Nongsawlia ka ju rakhe kumba ju long da kaba pyllong ia ka jingai sngewbha ia ki briew kiba donkam ia ka jingiarap, ka jingiaid jingrwai carol sawdong ka Sohra, ka jingbam khana kmen ia ka jingwan long briew u Jisu sha kane ka pyrthei.
Kaba sngew tynnad ba ki ju don ruh kiba wankai kiba ju iashim bynta ha kane ka jingrakhe Khristmas ka Balang Nongsawlia.
Ka ïingmane ha Nongsawlia ka khring ia ki nongjngohkai nabar
