Shillong: U President ka BJP Meghalaya u Rikman Marak ula ong ba ka BJP kan sei kyrtong beit tang da ki Garo ha ka elekshon sha ka GHADC namar ba ka Sixth Schedule ka dei beit tang ia ki riewlum.
Haba kren mynta ka sngi, u Rikman ula ong ba ka party haduh mynta kam pat khot ban thep kyrteng ia kiba angnud ban iakhun namar ba ym pat pynbna ia ka Tarik elekshon elekshon.
Ula ong ba ki bym dei riewlum kim don bynta eiei ha ka district council. “Baroh ki paidbah ki tip ba ki district council ki dei ia ki riewlum, bad ki bym dei riewlum kim don bynta eiei”, la ong u Rikman.
Ula kam ruh ba ha kane ka kynti, ka BJP kan leh kham bha ha kaba ki briew ha Garo Hills kila nang pdiang ia ka party.
Lah ban kdew ba dang shen, u Myntri sorkar ka NPP uba dei na rilum Garo u Timothy D Shira ula ong ba ki bym dei riewlum ruh ki lah ban iashim bynta ha ka elekshon MDC ha GHADC.
Halor kajuh ka por, haba kylli halor ka jingkynthah u President ka Congress Meghalaya ba ka One North East ka dei ka dur bula ka BJP, u Rikman ula ong ba ka jingkynnoh u President ka MPCC u bah Vincent H Pala ia ka BJP halor ka One North East, kam dei kaba phylla namar ba ka Congress bad ka BJP kim lah ban ia iaid lang.
U Rikman ula ong ba ka Congress ka dei ka liangpyrshah bad kan shu pyrshah beit ia kaei kaba ka BJP ka leh.
Ha kajuh ka por, ula ong ba ka BJP kam don eiei ban iadon bynta bad kane ka kynhun kaba ialam u President ka NPP u Conrad K Sangma hynrei ka BJP kan don beit ha ka shatri ka NDA bad kan ieng na ka bynta ki paidbah ka North East.
Ki District Council ki dei ia ki riewlum, ym ia kiwei, ong u President ka BJP
