Shillong: Ka seng Hynniewtrep National Youth Front (HNYF) Eastern Zone, Ri Bhoi ka la pynshna ia ka jingker ia ka skul Umpohwin Govt LP Skul, khnang ban iada ia ki khynnah na ka jingma khamtam na ki kali namar ba kane ka skul ka don ha syndah ka surok.
Ka la ju don ruh ka jingjia aksiden ha kane ka jaka la ar sien ia ki khynnah skul namar ba ka long lyngkrang.
Na ka liang ka shnong ka la ju pan jingiarap na u MLA ka thain kaba hap ha Mawhati konstitwensi, na u Deputy Commissioner, na ka tnad pule puthi bad kumjuh na ka PWD hynrei khlem urlong satia, hynrei dei na ka seng HNYF ba la ioh ia ka jingker ia ka skul.
U rangbah shnong ka Umpohwin Nongnup u bah Aibor Makdoh ula ong ba ka shnong ka la phah jingthoh ruh sha ka bor sorkar ban shna lynti iaid kjat ha katei ka jaka kaba don ka skul khnang ban shngain ki khynnah skul na ki kali ki motor hynrei haduh mynta ym pat urlong.
Ula khot ia u MLA ka thain ban wan peit shisien ha ka por ba iaid ki khynnah skul, khnang ba un iohi da ki khmat ia ka jinglong jingman.
Ia kane ka jingker sainar ia ka phyllaw ka skul, la ot ribbon ha ka 20 tarik Nohprah 2025 u President ka HNYF Ri-Bhoi District bah Hesting Lyngdoh, ha ka jingdon lang u President ka Eastern Zone bah Apbor Nongrum, u Head Master ka skul u babu Moonlight Ronghang, ki khynnah skul bad kiwei.
Na u MLA, DC, PWD ruh ym ioh, pynshna lem noh ka HNYF ia kynroh ka skul ha Umpohwin| khot wan peit u RS ia u MLA
