Shillong: Na ka bynta kito kiba kwah ban bam ia ki jingbam tynrai kiba khlem khleh dawai, kiba shu rah na lyngkha ha ïing shet ja beit sak, ki lah ban ioh ha ka iew tynrai ha shnong Liarkhla,Ri-Bhoi District.
Ia kane ka iew, la pyllong tang shi sngi mynta ka sngi ha katei ka shnong shi bynta ka sienjam kaba rit ban kyntiew ia ki nongrep katei ka thain.
Ha kane ka iew, ym tang ki jingbam tynrai, kum ki phan ki shriew, ki jhur, ki soh, hynrei kawei ka jingbam tynrai kaba khampher ka dei ka doh mattah, kaba la wanrah ban die ha kane ka iew.
Ha ka jingiakren bad kawei ka longkmie, ka la iathuh ba ka doh mattah ka dei kaba heh bad shong hapoh ka snep kaba eh bha ha kaba ka kam tang da ka lyer jong ka um bad ban shet ia ka, hap ban phon bad sa khoh ka snep bad sa shet, kan sa bang ngai.
Ia kane ka iew pyni nam ia ki ki mar rep na ka Raid Iapngar ne ki jingbam bad ki tiar tynrai la pyllong ka Hills Farmers Union (HFU) Raid Iapngar circle ha madan Liarkhla.
La plie da u MDC ka Umroi uba dei ruh u Executive Member bah Isynei Hinge.
U Secretary ka Hills Farmers Union (HFU) Ri-Bhoi District u bah Pynshai Masharing ula ong ba ka jingthmu jong kane ka iew, ka long ban kyntiew ia ki mar rep jong ki nongrep na katei ka thain bad kane ka dei ka jingsdang ha kaba yn sa bteng ha ki por ba wan.
Ka mattah ka doh kaba bang kum ka doh syiar ha iew tynrai ha Liarkhla
