Shillong: Ki nongdie madan hakhrum MUDA ha Khyndai Lad kila sdang phuhmut phuhmat bad kila sdang bunkam ban rah bad pyni ia ki mar ki mata namar ba ka iew ka la sdang thnem bha ha kine ki aiom Khristmas bad Snem thymmai.
Ha ka jingleit rung sha kane ka iew ban twad jingtip na ki nongdie madan mynta ka janmiet, kine ki nongdie madan kila pynpaw ba ka iew ka la nang kham thnem ha kine ki sngi hadien ba kila buh da ka signboard nabar ban tip ki paidbah da kaba iasei pisa hi na ka jingslem ka sorkar.
Kawei pat ka dei namar ba ki briew kila sdang ban kham tip ia kane ka iew hadien ba ka la iaid sha ka san bnai eiei mynta naduh ba kila kynriah na surok sha katei ka jaka parking ka MUDA.
Lah ban kdew ba ka jingpynkynriah ka sorkar ia ki nongdie madan na surok ha Khyndai Lad, ha ki bnai kiba la dep, ka la wanrah ka jingpyrshah na ki nongdie madan ba kam iew ka hat kam long hynrei mynta hadien san bnai, ka iew ka la sdang ban wan dur hadien ba ki paidbah kila sdang ban tip ban leit rung ban thied ia ki mar ki mata na katei ka jaka.
Ka jingbym shah ban die madan ha surok, ka la iarap ruh ia ki briew ban leit ia ki jingthied na katei ka jaka.
La kham bunkam ki nongdie madan ba sdang thnem ka iew hakhrum MUDA
