Shillong: Ka Meghalaya Football Association (MFA) kan pynbna lashai ka sngi ia ki kyrteng ki rang ialehkai naka bynta ban mihkhmat pat ia ka Meghalaya ha ka qualifying round jong ka lympung ialehkai 79th National Football Championship for Santosh Trophy kaban long hangne ha nongbah Shillong.
Ha kane ka kynti ia ka Meghalaya la pyniakap ia ka ha ka Group E, ba don lang ki artylli ki jylla kum ka Sikkim bad ka Arunachal Pradesh.
Haba iakren bad u nongthoh khubor, u coach jong ka kynhun u bah Khlain Pyrkhat Syiemlieh bad bah Cliff R Nongrum, Vice-President ka MFA, ki pyntip ba ka jingiakilan (practice) kaba pura ka kynhun ka dang ioh ba kan sdang ia ka dang hynnin ka sngi, ha kaba ki la pynpaw ba ki rang ialehkai ban jied ia ki ban mihkhmat ki bun bha, hynrei ka jingkhim palat jong ka por , namar ha ka 19 tarik la hap noh ban ialehkai, pynban u bah Khlain u niew bad shim ba ki rang ialehkai baroh ki long kiba la pynkhreh.
Ia kine ki player, ka MFA ka la ioh ba kan jied ia ki na ki lympung ialehkai kiba dang shu dep bad bynrap ba lashai hi pat ka sngi, yn sa lah ban pynbna mano napdeng ki player ba la wan sha ka jingpyrshang kiban ioh ban mihkhmat ha kane ka kynti.
Haba kylli la don ne em ki rang ialehkai kiba tbit bad ba kynsai hynrei ki ba don noh hapdeng ka jingbym da biang bha ka met, u bah Khlain u pynpaw ba ki don beit bad ki don ruh kiban dang wan ban iasnoh sha kane ka kynhun ba la khot pyrshang lashai pat ka sngi.
Kumban shu pynpaw ba dang ha ka sngi Saitjain jong ka taiew kaba la dep ba ka Shillong Sports Association ka la lah ba kan pynkut ia ka samoi ialehkai ka jong ka, da ka SSA Champions Cup kaba la rah da ka kynhun ialehkai jong ka Nongkseh SS&CC, hangne na ka liang bah Cliff u sngew ban ong ba kane kan iarap shibun bha ban pynkhreh ia ka team hynrei u bynniaw ba ka por pat ka long kaba la thmit, kaba hangne ka kynhun kam ioh ia ka por ba kylluid ban pynkhreh janai bha, kaba ha kane ka kynti, la ioh por tang ar sngi , kaba lah ban buh jingeh ia ka kynhun ba kan lah ban ia mir bad sngewthuh jingmut bha hapdeng ki player ban don ha ka kynhun.
Wat la katta ruh na ka liang bah Cliff u pynpaw ba kum ka kynhun kan pyrshang katba lah ban ioh rung sha kane ka lympung.
Kat kum ka prokram, ka jingialehkai ba nyngkong kan dei la 19 tarik ha kaba ka Meghalaya kan iakhun pyrshah ia ka Sikkim, ka jingiakhun kaba ar pat kan long ka Arunachal Pradesh pyrshah ia ka Sikkim kaban long ha ka 21 tarik bad ka Meghalaya kan aireng ia ka Arunachal Pradesh ha ka 23 tarik mynta u bnai Nohprah, bad ki jingiakhun baroh kin long ha SSA Stadium, First Ground, Polo.
Mynta yn pynmih kyrteng ka MFA sha ka lympung Santosh Trophy
