Shillong: Ka kompeni pynmih bording ka sorkar India ka North East Electricity Power Corporation (NEEPCO) ka la tyrkho jai bad sngew kut buit ban wad lad kumno ban ioh jaka na ka bynta ban pyntrei ia ka projek bording ha kane ka jylla Meghalaya.
Namar kane ka jingjwat tasam ka jingiakhun ban ioh jaka, ka NEEPCO ka la rai ban sangeh shwa ban shim projek ha Meghalaya watla kam pat shongthait ban wad da kiwei ki lynti ba thymmai lada ka don ka lynti.
Ha ka jingshisha, ka NEEPCO ka la shimti ban tei ia ka projek pynmih bording, ka Mawphu Hydroelectricity Project ne kaba la ai kyrteng hadien kum ka Umiam Hydro Projek, hynrei ka la hap ban kynran dien noh namar ba ka jwat palat ban ioh jaka namar ba ha kane ka jylla, ia ki jaka la long trai da ki riew shimet, ha kaba ka sorkar jylla kam don jaka lait noh tang katto katne ki jaka. Sa kawei pat, ka NEEPCO kam pat ioh ia ka Forest Clearance halor kane.
U Executive Director ka NEEPCO u Jayanta Sharma haba kren ha ka sngi Balang ha Umrangso, Assam ha ka 10 tarik Nohprah, 2025, ula ong ba watla ka NEEPCO ka shem jingeh ban ioh jaka ha Meghalaya hynrei kan iai pyrshang ban thaw ban pyntrei ia ki projek bording ha Meghalaya ha ki sngi ban wan.
Ha kawei ka liang, u Executive Director u la iathuh ba ka pung Kupli kaba tan bording ka NEEPCO ka ai jingmyntoi ia baroh ar liang, ka Meghalaya bad ka Assam namar ba ka don hapdeng kine ki ar jylla.
Ula iathuh na ka jingpynmih bording ka NEEPCO na kane ka pung, la die bording 12 percent ka bording sha ki jylla kiba don ka projek katkum ka kyndon kaba la buh ka sorkar India. Hynrei namar ba kane ka wah ka hap lang na Meghalaya bad ka Assam, la iasam ia kane ka 12 percent mar 6 percent ka bording.
Ka Kupli Hydroelectricity project ka pynmih ding 275 MW bad ka dei kawei ka projek ka NEEPCO kaba heh bha ha kane ka thain bad ka la kylla long ruh kum ka jaka jngohkai kaba pawnam ha katei ka thain Umrangso, Dima Hasao, ka Assam kaba iasyriem kum ka pung Umiam.
Ia ka Kupli Hydroelectricity Project la buh maw nongrim ka Prime Minister barim ka India ka Late Indira Gandhi ha u Iaiong u snem 1976.
Haduh mynta ka jingpynmih bording ka NEEPCO ka la kot sha ka 2057MW kynthup naduh kiba pynmih ding na ki wah, na ka gas bad kumjuh na ka solar energy bad sa 1426 MW ki projek kiba dang iaid mynta ban pynmih ding.
U Executive Director ula iathuh ba naduh ba la khang ka National Green Tribunal (NGT) ia ka jingtih dewiong thliew khnai na ki bynta ba hap ha Meghalaya, ka pung Kupli ka la kham duna ki jingjaboh bad ka la lah ban pynmih ding ruh kumba ka dei ban long.
Ka la ai jingim biang ia ki dohum dohwah na ka jingkhuid ka wah.
Mynta kane ka pung Kupli kaba pyniakhlad ia ka Meghalaya bad ka Assam, ka la kylla long ruh ka jaka jngohkai kaba pawnam namar baroh ar liang, kata, na Meghalaya bad na Assam ki ioh ban pyllong kum ka jaka jngohkai ban khring ia ki briew, bad kane ka la ai kam ia ki briew bad kyntiew ia ka ioh ka kot ki briew.
Na ka liang ka Meghalaya ka hap ha ka thain Saphai ka West Jaintia Hils katba na shaphang ka Assam, ka hap ha ka Umrangso, ka Hima Disao.
Ha katei ka jaka, yn pyllong ia ka Kupli Festival sha ka bynta kaba hap ha Meghalaya bad sha ka bynta ka Assam pat, kin pyllong ia ka Amul Falcon Festival.
Kut buit ka NEEPCO ban ioh jaka, ieh noh ia ka Mawphu ha Meghalaya
