Shillong: Mynta ka sngi, u myntri rangbah u Conrad K Sangma ula pynshai noh khuk khak mar ia byrthen u MLA ka North Shillong u bah Adelbert Nongrum halor ka jinglip ding soit shi soit.
Haba pynshai halor kane, u Conrad ula ong ba kam don satia ka jingpyllip ding ne ka load shedding ha ka jylla hynrei ka dei tang ka jingpyllip ne shut down namar ba dang maramot ia ki line na ka jingpyntreikam ia ka RDSS Scheme ha kaba kumba 2600 ki Transformer la bujli thymmai bad maramot, 3800 km ki waiar ba la rim la bujli, 4300km ki line dang shna na ka skhim kaba 900 klur tyngka.
U Conrad ula ong ba namar kane ka daw, ka don ka jingpyllip ding khah khah namar ka jingshna.
Shwa ia kane, mynta ka sngi, u MLA ka North Shillong u bah Adelbert Nongrum ula leit ujor syndon tain sha u myntri ka tnad bording ka jylla u bah Metbah Lyngdoh da ka jingthoh, halor ka jinglip light khah khah, khari khari, shiphang shiphang ha ka thain Jaiaw ha kine ki sngi, kaba la wanrah ka jingeh ia ki nongshong shnong.
Haba kren sha ki lad pathai khubor, u bah Adelbert ula ong u sngewkhia ia ka jingpynlip light kaba man ka por.
U la ong ba ka tnad MeECL ka dei ban wad ia ki briew kiba kitkhlieh ia kane bad lada don ka jingleh torti, dei ban shim kam katkum ba ka dei ban long, ym ban lehkai ia ka jingdonkam jong u paidbah.
Lah ban kdew ba mynshwa, u myntri bording barim u AT Mondal ula ong ba kam don ym shuh ka jingpyllip ding ha ka jylla hynrei hadien ba la bujli myntri, ka jinglip ding ka la jia kha khah ha ka thain bad ha kiwei ki jaka.
Mar ia byrthen u bah Adelbert ba lip ding, khuk khak pynshai noh u Conrad
