Shillong: Ki nongialam ka Khasi Welfare Committee (KWC) na jylla Mizoram hapoh ka jingialam ka Students Union (KSU) kila iakynduh ia u myntri rangbah ka Meghalaya u Conrad K Sangma mynta ka sngi, ban kyntu ia u ban iakren bad ka sorkar jylla Mizoram ban ai noh ia ka Land Settlement Certificate (LSC) ia ki Khasi kiba sah ha katei ka jylla.
Ka jingbym pat ka sorkar jylla Mizoram ia ka dulir khyndew, ka la buh shibun ki jingeh ia ki Khasi kiba sah ha katei ka jylla ha ka thain Vairengte, Mizoram.
Ki nongialam ka KWC Mizoram kynthup u President bah Vailat Sutong bad u Secretary bah Andrew Dkhar kila ong ba ki Khasi kiba la sah ha katei ka thain da ki spah snem, ki la iakynduh jingeh na ka jingbym ioh ia ka dulir khyndew haduh kine ki sngi.
Ha kane ka jingiakynduh, ki la iakren ruh halor ka jingkyrshan pisa na ka sorkar Meghalaya na ka bynta ban tei ia ka dorbar hall jong ki Khasi ha katei ka shnong, na ka bynta ba kin ioh ban pyllong ia ki jingialang, bad kiwei ki kam na ka por sha por.
Na ka liang u General secretary ka KSU u samla Donald V Thabah ula ong ba ki Khasi kiba sah ha jylla Mizoram kila don lypa da ki spah snem, shwa ban ioh ia ka jylla Mizoram, shwa ban ioh ia ka jylla Meghalaya ruh. Ula ong ba watla la iakren bunsien bad ka sorkar jylla Mizoram hynrei haduh mynta khlem seisoh eiei bad na kane ka daw, ki wan ban pan jingiarap na ka sorkar Meghalaya ba kan iakren ia ka sorkar Mizoram.
Ki Khasi ha Mizoram kim ioh patta khyndew, Kynduh ia u Conrad ban tuklar lem
