Shillong: Kawei ka longkmie na shnong Manad, kaba don ha South West Khasi Hills ka la shim ia ka sienjam ban trei ia ka kam kaba khampher. Kane ka dei ka kong Rusphulda Shylla, ka longkmie kaba la pyni ia ka sap jongka ha kaba wat ki shynrang ruh ki kham niar kiba lah ben leh ia kane ka kam.
Ka kong Rusphulda ka dei ka longkmie kaba ri ngap bad ka la sdang ia kane ka kam naduh u snem 2007 khlem don ba hikai eiei hynrei ka don ka jingkwah lajong jongka.
Ym dei ba ka ri sngewbha hynrei ka don ruh ka jingmyntoi na kane ka kam ri ngap na ka bynta ban kyrshan ia ka ïing ka sem da kaba die ia ka um ngap.
Ha ka jingiakren bad ka kong Rusphulda, ka la iathuh ba wat la ka don ka jingsngew tieng ioh shah dait ha ki ngap hynrei ka la tur ban pyrshang ia kane ka kam. Ha shnong Manad, ka dei tang maka, kaba leh ia kane ka kam ri ngap.
Ka don haduh 15 ksing eiei ki kisng ba ka ri ngap hynrei mynta kila duna namar ba ki iap na ka jingkylla ka mariang. Ka la iathuh ba ka sei lai sien ha ka shi snem bad ka ju leit sha Mawkyrwat bad sha kiwei ki jaka.
Ka la iathuh ba mynta ka kham jynjar ban ri ngap namar ba ki iap ne ki phet kaba lah ban dei na ka jingduna bam bad kawei lehse dei na ka jingpyndonkam dawai ha ki jingthung kaba pyllong ia ki ngap ban iap haba ki leit sei bam bad kawei pat ka lah ban dei namar ba ki don ki jait ngap kiba jaipdeh ki iap thngan namar kim leit wad jingbam. Kawei pat ki don ki kynja khniang kiba bam ia kine ki ngap, kiba shong ha rew ngap bad kine kila pynthut haduh ba ki ngap ki phet noh na ksing.
Ka la iathuh ba dang shen, na ka jingwan ka erlang thari, ka la khyrwait ia ki ksing ngap haduh ba kila pra bad jot lut.
La iathuh ba haduh mynta ka la shu trei beit na ka um syep lajong bad kam pat ioh jingkyrshan eiei na ka sorkar ne na ki nongmihkhmat namar ba ha ka jinglong nongkyndong, kam tip lad ruh ban leit jingiarap na ka sorkar.
Haduh mynta kam pat ioh jingiarap ne jingkyrshan na ka bor sorkar lait noh tang ki ksing ngap. Lada ka ioh jingkyrshan, ka lah ban trei kham bha shuh shuh ia kane ka kam namar ba ia mynta ka la aiti met bad mynsiem ban trei wat ia kane ka kam ban nang lah ban kyntiew shuh shuh ia kane ka kam ba ka trei.
Ri ngap ka longkmie ha shnong Manad ban kyrshan ia ka ïing ka sem
